“Үөһээ Бүлүү улууһа” муниципальнай оройуон дьаһалтатын аатыттан уонна тус бэйэм Эһигини салаллан иһэр 2025 сылынан эҕэрдэлиибин!
Ааспыт сыл түмүктэрин анааран көрө олорон, бастатан туран, Эһиэхэ дьаһалта тула түмсүбүккүт, биир өйүнэн-санаанан, дойдубут туһун толкуйдаан, туруоруллубут соруктары толорууга бары бииргэ буоларга бигэ санааны ылыммыккыт иһин барҕа махталбын биллэрэбин!
2024 — Россияҕа дьиэ кэргэн, Саха сиригэр оҕо саас, улууспутугар түмсүү сылыгар бэрт үгүһү ситистибит. Суол оҥоһуута, дьиэ-уот тутуута, газ, уот, ититэр ситимнэргэ холбонуу, социальнай эбийиэктэр, саҥа үлэ миэстэлэрэ, үөрэх, идэ биэрии, култуура, успуорт, тыа хаһаайыстыбатын сайыннарыы ньымаларын толкуйдааһын – бары хайысхаларга саҥаны-сонуну киллэрии баара хайҕаллаах.
Кэлэр сылга сорукпут үгүс. Сыл хайдах буолара хас биирдиибит төһө айымньылаахтык, төһө туһалаахтык, төһө түмүктээхтик үлэлиириттэн тутулуктаах. Улууспут дьонун-сэргэтин олоҕун уйгута тупсарын, ыччаппыт кэскилэ кэтириирин туһугар тугу торумнаабыппытын барытын толоруох тустаахпыт. Оччоҕо эрэ Үөһээ Бүлүүбүт, Сахабыт сирэ, Россиябыт модун кыахтаныа! Маннык өйдөбүлүнэн үлэбитин-хамнаспытын тэриннэхпитинэ, түмсүүлээх, сомоҕолоһуулаах буоллахпытына, туох барыта кыаллыа, улууспут иннин диэки эрэллээхтик хардыылыа, балысханнык сайдыа.
Саҥа үүнэр 2025 сылы модун дойдубут Россия Бэрэсидьиэнэ В.В.Путин “Аҕа дойдуну көмүскээччи сылынан”, Саха Өрөспүүбүлүкэтин Ил Дархана А.С. Николаев “Төрөөбүт дойдуну көмүскээччи сылынан” биллэрдилэр. Бу 1941-1945 сс. Аҕа дойдуну көмүскүүр Улуу сэриигэ сэбиэскэй норуот албан ааттаах Кыайыытын 80 сылын бэлиэтиир сылга олус тоҕоостоох, дириҥ суолталаах.
Анал байыаннай дьайыы кыайыынан түмүктэнэн, эдэркээн, олохторун толук уурары кэрэйбэккэ, Украина нацистарын кытта кыргыһа сылдьар уолаттарбыт этэҥҥэ дьиэлэригэр-уоттарыгар, дьонноругар-сэргэлэригэр эргиллэн кэллиннэр диэн барыбыт баҕа санаабыт булгу туоллун!
Саҥа сылга эйэлээх халлааны, саҥаттан саҥа ситиһиилэри! Хас ыал аайы уоттаах харыйа үтүмэн үгүс үөрүүнү, дьолу-соргуну тосхойдун! Уруй!
Истиҥ эҕэрдэни кытта
Үөһээ Бүлүү улууһун баһылыга Валерий Николаев