Аҕам саастаах дьон декадаларыгар түбэһиннэрэн, 7-с нүөмэрдээх «Сказка» оҕо уһуйаанын коллектива сэргэх быыстапканы тэрийдэ. Манна эбээлэрбит уонна эһээлэрбит ойор-тэбэр оҕо саастарыгар оонньообут оонньуурдарын көрдөрүүгэ туруордулар. Оонньуурдары төрөппүттэр, үлэһиттэр кимиэхэ туох баарынан аҕаллылар.
Кырачааннар былыргы оонньуурдары олус сэргии көрдүлэр, төрөппүттэр да интэриэһиргээтилэр. «Оо, мин маннык ооньуурдаах этим, өйдүүбүн» диэн саҥа аллайыы элбэхтэ иһилиннэ, оҕо саас умнуллубат түгэнин санатта. Экспонаттарга араас барыта баар: иистэнэр массыына, рояль, диафильм, чебурашкалаах Гена, карточкалар, оннооҕор туттуллубатах 30 копейкалаах пластилин. Саамай кырдьаҕас экспонат — 1973 с. иистэнэр массыына.
