Сэтинньигэ Саха сиригэр 895 оҕо төрөөбүт: 449 уол, 446 кыыс. Дьиэ кэргэн уонна Оҕо саас сылыгар өрөспүүбүлүкэҕэ 11 ый устата 9834 кырачаан күн сирин көрбүт, онтон кыыһа – 4840 , уола – 4994.
Оттон Үөһээ Бүлүү улууһугар 11 ый устата 183 оҕо төрөөбүт. Мантан уола — 94, кыыһа — 89, ол иһигэр икки игирэ. Сэтинньигэ 16 кырачаан эбиллибит: 8 кыыс, 8 уол.
Гражданскай турук аакталарын толорор уорган Саха сиринээҕи управлениета иһитиннэрбитинэн, уолаттар ортолоругар ордук Лев, Мирон, Арсений, Виктор, Марк, Роман, Харысхан диэн ааттар баһыйар элбэх ахсааны ылбыттар.
Сэтинньи ыйга төрөөбүттэргэ маннык ураты ааттар бэлиэтэммиттэр – Адам, Арун, Демид, Мирослав, Нико, Райэл, Салмон. Кыргыттар ортолоругар Диана, Аделина, Виктория, Мия, Анна, Милана, Варвара диэн ааттар ордук баһыйбыттар. Оттон ураты ааттаах кыргыттар – Дия, Злата, Марва, Раёона, Тиана, Элима, Юна диэн буолбуттар.
Үөһээ Бүлүүгэ сэтинньигэ төрөөбүт оҕолорго Сеяна, Али, Эрэл уонна Чэлгийээнэ диэн ааттар ураты буолан бэлиэтэммиттэр.
Дойду Президенэ Владимир Путин көҕүлээһининэн үлэлиир «Демография» национальнай бырайыакка олоҕуран, Өрөспүүбүлүкэбит Ил Дархана «Дети столетия» тус сыаллаах хапытаалы хас биирдии төрөөбүт оҕоҕо анаабыта.