Ыам ыйын 22 күнүгэр, Ытык Нам нэһилиэгэр «Социальный десант» улуус сүрүн социальнай хайысхалаах тэрилтэлэрин салайааччылара, специалистара кэлэн нэһилиэнньэни кытары үлэлээтилэр.
Үөһээ Бүлүү улууһун баһылыгын социальнай хайысхаҕа уонна дьиэ кэргэн бэлиитикэтигэр солбуйааччы Анна Михайловна Уларова салайыылаах — «Социальный десант» улуус сүрүн социальнай хайысхалаах тэрилтэлэрин салайааччылара, специалистара кэлэн Ытык Нам нэһилиэгин олохтоохторун кытта көрсүһүүттэн, сэргэх сэһэргэһииттэн, кэпсэтииттэн үлэлэрин саҕалаабыттара. Көрсүһүүнү Үөһээ Бүлүү улууһун баһылыгын социальнай хайысхаҕа уонна дьиэ кэргэн бэлиитикэтигэр солбуйааччы Анна Михайловна Уларова иилээн-саҕалаан ыытта. Пенсионнай уонна страховой фонда салаатын салайааччыта Альбина Николаева Социальнай көмүскэл уонна үлэҕэ социальнай сайдыыга управлениетын салайааччыта Екатерина Николаева, үлэлээх буолуу киинин специалиһа Марианна Терентьева олохтоохторго наадалаах иһитиннэриини билиһиннэрдилэр. Боппуруостарга эппиэттээтилэр. Олохтоох дьаһалтаҕа социальнай көмүскэл уонна үлэҕэ социальнай сайдыыга управлениетын специалистара Николаева А.А., Ильина А.Н. пенсияҕа, пособиеҕа эрдэттэн сайаапканан докумуоннарын бэлэмнээн аҕалан сөптөөх хоруйдары, сүбэлэри биэрдилэр. Нэһилиэнньэ дьарыктаах буолуутун киинин специалиһа Терентьева М.Х. сайын устата оскуола саастаах оҕолор дьарыктаах буолалларыгар сөбүлэҥ түһэристэ.
Реабилитационнай центр специалиһа Семенова Н.И. уонна опека отделын специалиһа Петрова В.А. ТЖС учуотугар турар ыаллары кытта көрүстүлэр, санааларын иһиттилэр.
Социальнай көмүскэл уонна үлэҕэ социальнай сайдыыга управлениетын салайааччыта Екатерина Николаева, специалист Мира Роменская ыалларынан сырыттылар уонна 2023 с. социальнай контрагы туһанан бэйэ дьыалатынан дьарыктанар дьоҥҥо сылдьан көрдүлэр, бэрэбиэркэлээтилэр, үлэлэрин-хамнастарын билистилэр, салгыы сайдалларын, кэтэх хаһаайыстыбаларын кэҥэтэллэригэр баҕа санааларын эттилэр.
Сокуоннай саастарын ситэ илик оҕолор дьыалаларыгар хамыыһыйа специалиһа Алексеева Н.И., опека отделын специалиһа Петрова В.А. анал программалаах кэлэн Нам орто оскуолатын үөрэнээччилэрин уонна учууталлары кытта үлэлээтилэр. «Социальнай десант» нэһилиэнньэҕэ кэлэн олохтоохтор кыһалҕаларын, ыарырҕатар боппуруостарыгар сөптөөх хоруйдары биэрэн, соруктаах үлэлэрин толордулар.
«Социальнай десант» Нам нэһилиэгэр кэлэн үлэлээбит көрсүһүү түмүгүнэн нэһилиэк баһылыгын солбуйааччытын Мария Кривошапкинаны, дьаһалта специалистарын кытта үлэлэрин түмүгүн билиһиннэрдилэр уонна салгыы үлэлэһэргэ, олохтоохтор олохторо тупсарыгар кыһалҕаларын быһаарарга бииргэ үлэлэһиэх буоллубут.
Биһиэхэ кэлэн үлэлээбит «Социальнай десант» хамаандатыгар сыралаах үлэлэригэр үрдүк ситиһиилэри, чэгиэн-чэбдик доруобуйаны баҕарабыт.
Нам нэhилиэгин дьаhалтата.