Бүгүн, ахсынньы 18 күнүгэр, улуус дьаһалтатын аактабай саалатыгар социальнай тэрилтэлэр салайааччылара кыттыылаах доруобуйаларынан хааччахтаах дьоҥҥо көрүллэр социальнай өҥөлөр тула төгүрүк остуол буолла.
Төгүрүк остуолга Үөһээ Бүлүү улууһун баһылыгын социальнай боппуруостарыгар уонна дьиэ кэргэн бэлиитикэтигэр солбуйааччы Анна Уларова, улуус баһылыгын дьаһалта дьыалатын салайыыга солбуйааччы Михаил Егоров, доруобуйаларынан хааччахтаах дьон уопсастыбаларын бэрэссэдээтэлэ Зоя Петрова, үлэ уонна нэһилиэнньэ социальнай харысхаллаах буолуутун салалтатын салайааччытын эбээһинэһин толорооччу Зоя Егомина, пенсионнай уонна социальнай пуонда клиент сулууспатын салайааччыта Альбина Николаева, «Мин докумуоннарым» элбэх өҥөнү оҥорор киин салайааччыта Анегина Малычехорова, улуус прокурорун көмөлөһөөччүтэ Елизавета Анахина, киин балыыһа сүрүн бырааһын солбуйааччы Мария Прокопьева, нэһилиэнньэ дьарыктаах буолуутун киинин инспектора Наталья Обоева уонна Үөһээ Бүлүү нэһилиэгин дьаһалтатын исписэлииһэ Марина Максимова кытыннылар.
Кэпсэтиигэ сүрүннээн социальнай көмө, контракт, босхо эминэн хааччыйыы, юридическай көмө о.д.а. туһунан кэпсэтии барда. Социальнай өҥөлөрү оҥорор тэрилтэ үлэһиттэрэ араас көмө туһунан иһитиннэриилэри оҥордулар, саалаҕа мустубут доруобуйаларынан хааччахтаах дьон кыһалҕалаах боппуруостарын ыйытан, этинэн хоруйдары, сүбэлэри-амалары ылан бардылар.
Бэлиэтээн эттэххэ, биһиги улууска 236 1-кы группалаах, 321 иккис группалаах, 571 үһүс группалаах доруобуйаларынан хааччахтаах дьон олорор. Ону таһынан 274 оҕо баар. Оҕолор ахсааннара халбаҥныыр, тоҕо диэтэр реабилитация кэнниттэн доруобайдар ахсааннарыгар киирэллэр уонна 18 сокуоннай саастарын ситтэхтэринэ улахан дьоҥҥо көһөн биэрэллэр.
Киин балыыһа сүрүн бырааһын солбуйааччы Мария Прокопьева иһитиннэрбитинэн, босхо эминэн хааччыйыыга федеральнай уонна муниципальнай бырагыраамалар үлэлииллэр. Босхо эмп сахарнай диабеттаах, гепатиттаах, бүөрдэринэн ыалдьар дьоҥҥо о.д.а. көрүллэр. Федеральнай бырагырааманан соҕотох киһиэхэ ыйга 1051 солк. суума көрүллэр.
-
Биллэн турар, эмп сыаната ыарахан. Холобур, хаан убатар эмп 3500 солк. суумалаах. Ону таһынан ыарыһах хаанын баттааһынын, холестерины түһэрэр эмптэри эмиэ иһиэн наада. Онон ыйга көрүллэр суума намыһах диэн бэлиэтиибит. Федеральнай бырагырааманан 15 мөл. кэриҥэ харчы көрүллэр, муниципальнай бырагырааманан 17 мөл. кэриҥэ солк. көрүллэр, онтон 5 мөл. 918 солк. – оҕолорго. Бу сылга көрүллүбүт харчы бэс ыйыгар бүппүтэ. Инбэлииккэ саҥа тахсарга Дьокуускай куоракка Медцентрга эбэтэр РБ-2 киинигэр обследование ааһан баран биирдэ биһиэхэ кэлэллэр, үс эрэ ый иһигэр ааһар болдьохтоохтор.
Үлэ уонна нэһилиэнньэ социальнай харысхаллаах буолуутун салалтатын салайааччытын эбээһинэһин толорооччу Зоя Егомина социальнай контракт туһунан кэпсээбитэ дьон сэҥээриитин тарта.
Үлэлиир кыахтаах саастаах доруобуйаларынан хааччахтаах дьоҥҥо бэйэ дьыалаларын тэрийиигэ социальнай контракт көрүллэр. Быйыл бу өҥөнөн 7 киһи туһанна, ол иһигэр 3 киһи дьоҕус хаһаайыстыба тэриннэ.
Маны таһынан 78 киһи (олортон 7 оҕо) реабилитация ааһарыгар техническай тэриллэри ылан туһанна. Үксүн подъемник, орон, көһө сылдьар ванна, ваннаҕа туттуллар кириэһилэ, устудьуоннарга компьютер, быччыҥнары сайыннарар тэрил, будильник, радиоприемник о.д.а. туһанан олохторун-дьаһахтарын чэпчэтэллэр, доруобуйаларын бөҕөргөтөллөр. Онтон кулгаахтарынан истибэт дьон аппараттарын, онно аналлаах батареяларын атыыластахтарына, чектарын илдьэн туттардахтарына атыыласпыт харчыларын төттөрү ылар кыахтаахтар.
Пенсионнай уонна социальнай пуонда клиент сулууспатын салайааччыта Альбина Николаева кинилэр тэрилтэлэрин нөҥүө санаторнай-курортнай эмтэнээһин бырагырааматынан туһаныахтарын сөбүн туһунан кэпсээтэ. Былырыын 23 эрэ доруобуйаларынан хааччахтаах дьон бу өҥөнөн туһаммыт буоллаҕына, быйыл 77 киһи сынньанан, эмтэнэн кэллэ. Инникитин да бу бырагыраама салҕанар, онон Пенсионнай уонна социальнай пуонда клиент сулууспатыгар утары тиийэн билсэллэригэр Альбина Ивановна эттэ. Маны таһынан былырыыҥҥыттан доруобуйаларынан хааччахтаах оҕолоох үлэлиир төрөппүттэргэ эбии аҕыйах хонуктаах төлөнөр уоппуска көрүллэрин санатта.
«Мин докумуоннарым» элбэх өҥөнү оҥорор киин салайааччыта Анегина Малычехорова тэрилтэлэригэр босхо көрүллэр юрист өҥөтө баарын туһунан иһитиннэрдэ. Бу өҥөнөн доруобуйаларынан хааччахтаах дьон уонна оҕолоох төрөппүттэргэ көрүллэр көмөнөн буолар. Консультация тылынан да, суругунан да буолуон сөп. Үөһээ Бүлүүтээҕи «Мин докумуоннарым» элбэх өҥөнү оҥорор кииҥҥэ юрист суоҕунан сибээстээн, боппуруостары кэтэхтэн олорон быһаараллар.
“Госуслуги” электроннай өҥөтүн сатаабат дьон суругунан да докумуоннарын киллэриэхтэрин сөбүн ыйда.
-
Биһиги кииммитигэр кыайан кэлбэт түгэҥҥитигэр, докумуоҥҥутун эрдэттэн бэлэмнээн, төлөпүөнүнэн бириэмэтин болдьоһон баран специалиһы дьиэҕитигэр ыҥырыаххытын сөп. Маннык өҥө Үөһээ Бүлүү эрэ иһигэр үлэлиир. Ону таһынан, биһиги кииммитигэр уочарата суох специалистка МСЭ докумуоҥҥутун көрдөрөн баран быһа киириэххитин сөп.
«Мин докумуоннарым» элбэх өҥөнү оҥорор киин регионнааҕы быһа биир кэлим нүөмэрэ – 8-800-100-22-16
Нэһилиэнньэ дьарыктаах буолуутун киинин инспектора Наталья Обоева хайдах учуокка туруохха сөбүн кэпсээтэ, төлөбүрдэрин кээмэйин ыйда. Учуокка турар киһи араас үөрэхтэргэ, куурустарга үөрэниэн, быстах үлэлэргэ үлэлиэн сөп. Маны таһынан, бэйэ дьыаланы тэрийиэн баҕалаах доруобуйаларынан хааччахтаах дьоҥҥо биисинэс-былаан суруйуутугар 3 күннээх үөрэх ыыталлар.
Мария Васильева,
«Үөһээ Бүлүү» хаһыат