Н.Г.Золотарев – Якутскай аатынан Харбалаах орто оскуолатын историяҕа уонна обществознаниеҕа учуутала Мария Алексеевна Кузьмина Үөһээ Бүлүү улууһун аатыттан өрөспүүбүлүкэҕэ ыытыллар «Сыл бастыҥ учуутала” куонкуруска кытта барда. Куонкурус бу күнтэн саҕалаан ахсынньы 13 күнүгэр диэри буолара былааннанар. Россияҕа Дьиэ кэргэн, өрөспүүбүлүкэҕэ Оҕо саас уонна Улуу Кыайыы 80 сыллаах үбүлүөйүн бэлиэтиир дааталарын көрсө буолар тэрээһин үрдүк суолталаах.
Мария Алексеевна 2013 сылтан Харбалаах орто оскуолатыгар 11-с сылын айымньылаахтык үлэлиир, коллегаларын уонна үөрэтэр оҕолорун ортолоругар убаастабылы, билиниини ылар. Кини 2023 с. “Үөрэҕирии эйгэтигэр сулууспатын иһин” мэтээл, 2024 с. “Саха сирин эрэлэ” түөскэ кэтиллэр бэлиэ хаһаайкаларынан буолар, ону таһынан бастыҥ үлэтин иһин СӨ Үөрэх министиэристибэтиттэн бочуотунай грамоталаах.
Мария Алексеевна оҕолору историяҕа уонна обществознаниеҕа үөрэтэрин таһынан, иллэҥ кэмигэр дьиэ кэргэн төрүччүтүн үөрэтэр, ас астыырын сөбүлүүр уонна волейболлуур. Волейболлаан оҕолору доруобай олоххо көҕүлүүр уонна хамаанда үлэтигэр, кыайыыга-хотууга үөрэтэр. Учуутал быһыытынан хас биирдии оҕоҕо личноһын арыйан олоҕун аартыгар ситиһиилээх киһи буолан тахсарыгар баҕарар. Мария Алексеевна тапталлаах кэргэн, үс уол күн-күбэй ийэтэ.
«Мин идэм үлэ эрэ буолбакка, олоххо кэлбит аналым! Үөрэтэр оҕолорум, чинчийээччилэрим ситиһиилэриттэн, олимпиадаҕа, куонкурустарга кыайыыларыттан наһаа үөрэбин, сүрэҕим сылааһынан туолар, кинилэр кыайыылара – мин эмиэ кыайыыларым. Мин история учуутала уонна методическай түмсүү салайааччыта буоларым быһыытынан, мэлдьи коллегаларбыттан үөрэнэбин, бэйэм уопутпун эмиэ тарҕатабын. История учууталларын кытары санааларбытын үллэстэбит, түмүктэри ырытабыт, саҥа методикалары киллэрэргэ үөрэнэбит. Холобур, соторутааҕыта түҥ былыргы историяны үөрэтэр саҥа факультативнай куурус бырагырааматын айдыбыт, ол иһигэр интерактивнай элеменнары уонна бөлөҕүнэн бырайыактары киллэрдибит. Коллективынан үлэ саҥалыы үөрэтэр ньыманы туһанарбытыгар көмөлөстө. Үгүс семинардарга уонна конференцияларга кыттаммын учуутал быһыытынан сайдабын, ол биллэн турар, бэйэбэр, педагогическай састаапка уонна оҕолорго көмөлөһөр дии саныыбын. Тоҕо диэтэр, бэйэтин сайыннарар учуутал — оҕолор инники суолларын арыйарыгар төһүү күүс буолар”, — диэн Мария Алексеевна кэпсээтэ.
Улуус аатын көмүскүүр учууталга ситиһиилэри, кыайыыны-хотууну баҕарыаҕыҥ!
«Үөһээ Бүлүү» хаһыат
«Үөһээ Бүлүү» улуус хаһыатыгар чэпчэтиилээх сурутуу буола турар https://podpiska.pochta.ru/press/%D0%9F%D0%98976