“Сүрэҕэ суох” голубцы

Сотору кэминэн идэһэ өлөрүллэн, эт ас дэлэйиэ турдаҕа. Ону кытта хаһаайкалар чугас дьоннорун минньигэс, тотоойу аһынан күндүлүүр түбүккэ түһүөхтэрэ. Кинилэргэ анаан бүгүн судургу голубцы ырысыабын билиһиннэрэбит. Бүлүүдэ нууччалыы аата — «Ленивые голубцы».

Туох нааданый?

  1. Ханнык баҕарар эт фарша – 400 грамм
  2. Сибиэһэй хаппыыста – 300 грамм
  3. Моркуоп – 1 устуука
  4. Репчатай луук – 1 устуука
  5. Ириис куруппа – 0,5 ыстакаан
  6. Сымыыт – 1 устуука
  7. Туус – 1 чаайынай ньуоска
  8. Сүөгэй – 150 грамм
  9. Томат паастата – 1 ост. ньуоска
  10. Хара биэрэс – 2 кымаах
  11. Бэйэҥ сөбүлүүргүнэн бороһуок тума (укроп, петрушка, базилик, паприка) – 2 кымаах

Бастаан ирииһи кыратык сымныар диэри буһарабыт. Хаппыыстаны бытархай гына (кубик да, соломка да буолуон сөп) кырбыыбыт. Хаппыыста кытаанах, сүмэһинэ суох буоллаҕына, итии оргуйбут уунан саба кутан баран, 5 мүнүүтэ туруорабыт уонна уутун ыгабыт. Хаппыыстаны, ирииһи уонна сымыыты фаршка кутабыт. Луугу бытархай гына кырбыыбыт, моркуобу орто теркаҕа аалабыт, фаршка эбэн биэрэбит. Дьэ, уонна бу фарштан кэтилиэттэри оҥоробут.

Томат паастатын ууга суурайабыт. Кэтилиэттэрбитин арыынан сотуллубут лиискэ тэлгэтэ уурабыт, томат паастатын бүрүйэ кутабыт. Духовкабытын 180 кыраадыска туруоран, голубцыларбытын биир чаас буһарабыт. Маннык астаммыт голубцылары сибиэһэй сүөгэйи уонна күөх үүнээйилэри кытта остуолга уурар ордук. Гарнирыгар буспут хортуоппуйу, эбэтэр хортуоппуй пюрета ордук барсар.

Сүбэ: сорох хаһаайкалар голубцылары духовкаҕа уган баран бастаан 30 мүнүүтэ фольганан бүрүйэн буһараллар, онтон фольгатын ылан баран кыра соус хаалыар диэри 20-чэ мүнүүтэ буһараллар эбит.

Минньигэстик аһааҥ!

Бэлэмнээтэ Галина Васильева

Читайте дальше