Үөһээ Бүлүүттэн төрүттээх сүүрүүкпүт Алена Татаринова Санкт-Петербурга ыытыллыбыт «Белые ночи» марафоҥҥа кыттан 2 чаас, 32 мүнүүтэ, 46 сөкүүндэ көрдөрүүлээх марафон чемпионун үрдүк аатын ылла.
Биир дойдулаахпытын Алена Татаринованы кыайыытынан эҕэрдэлээн туран интервью ыллыбыт, санаатын иһиттибит.
— Ыам ыйын 12 күнүгэр Казань куоракка Россия чемпионата буолбута, онно сүүрэммин 2 миэстэни ылбытым. Ол кыттыы кэнниттэн тириэньэрбин кытары «Белые ночи» марафоҥҥа кыттыахпыт диэн быһаарыммыппыт. Тутатына бэс ыйын 1 күнүгэр Кисловодскайга сборга барбытым. Ол кэнниттэн күрэххэ кыттардыы кэлбитим.
— Кыайыыгын кимиэхэ аныыгын?
— Кыайыыбын чугас дьоммор, ийэбэр, аҕабар, эдьиийбэр, кэргэммэр, оҕолорбор аныыбын.
— Үгүс дьон эйигин сүтэрбит эбиттэр. Ааҕааччыларбыт ханна сүттэ, тугу гынар диэн ыйыталаһаллар. Ол туһунан кэпсээ эрэ.
— Кырдьык, 10 сыл сынньалаҥҥа сылдьыбытым. Үөрэнэ сылдьан 1 кууруска тохтообутум, 2019 с. төннөн Манчаары оонньууларыгар кыттыбытым, 7-с спортивнай оонньууларга марафоҥҥа бастаабытым.
Сбербааҥҥа 3 сыл үлэлээбитим, сүүрүүгэ төннөн баран уурайбытым. Кэргэммир кытта Дьокуускайга кроссовка атыылыыр маҕаһыыннаахпыт. Икки оҕолоохпут, уолаттарбыт 13 уонна 10 саастаахтар.
— Билигин кимиэхэ дьарыктанаҕын?
— Сүрүн тириэньэрим Екатеринбург куоракка баар. РФ үтүөлээх тириэньэрэ, сүүрүүк Олег Петрович Харитонов, онтон Саха Сиригэр иккис тириэньэрбинэн Василий Афанасьевич Спиридонов буолар.
— Салгыы туох былааннааххын?
— Салгыы Москва куорат марафона. «Брикс» диэн марафон лигата баар, ол иһигэр 3 Россия бөдөҥ марафоннара киирэллэр: Казаннааҕы, «Белые ночи», Москватааҕы. Бу 3-с марафону сүүрэр былааннаахпын.
— Биир дойдулаахтаргар баҕа санааҥ?
— Спортсмен буоларым быһыытынан, спордунан дьарыктаныҥ, чөл олоҕу тутуһуҥ диибин! Саамай сүрүнэ, кытаанах доруобуйаны баҕарабын!
Дойдубун наһаа таптыыбын, дойдум көмөтө өйөбүл буолла, күүс-сэниэ биэрдэ. Уһун сынньалаҥ кэнниттэн спортка төннөрүм ыарахан этэ. Бастаан саҕалыырбар дойдум көмөлөһөн, маннык ситиһиигэ кэллим.
Түгэнинэн туһанан, Владимир Семенович Поскачиҥҥа, Валерий Валерьевич Николаевка, Егор Алексеевич Николаевка, Василий Тихонович Петровка махталбын тиэрдэбин!
Мария Васильева,
Газета «Үөһээ Бүлүү»