Ааспыт субуотаҕа Үөһээ Бүлүү улууһун Өргүөт нэһилиэгэр «Туллукчаан — от» уһуйаан 65 сыллаах үбүлүөйэ үрдүк тэрээһиннээхтик ааста.
Үбүлүөй уһуйаан үлэтин көрдөрөр араас кэмнэрдээҕи сэдэх хаартыскалар фотовыставкаларыттан саҕаланна. «Эбээм оонньуурдара» түмэл тэрийбиттэригэр былыргы оонньуурдары тутан — хабан көрөн астынныбыт. Бэйэбит оҕо сааспытын санаан ыллыбыт. Актовай сааланы сахалыы тыыннаан Оксана Николаевна Васильева уруһуйдаабыта көрүөхтэн эриэккэс. Уһуйааны сатабыллаахтык Марианна Иосифовна Захарова салайар.
Үбүлүөй иккис чааһа культурнай-спортивнай кииҥҥэ буолла. Оҕону иитиигэ- үөрэтиигэ кыһамньылаах, сыралаах үлэһиттэргэ, ветераннарга улуус Сэбиэтин депутаттарын, нэһилиэк дьаһалтатын ааттарыттан баһылык солбуйааччыта С. В. Тобохов, улуус үөрэҕин начальнигын Ю. В. Кынатов, үөрэх салаатын профсойууһун председателин А. Н. Федоров уонна бэйэтин махтал суруктарын оскуолаҕа киириэн иннинээҕи үөрэхтээһин салаатын сэбиэдиссэйэ Ньургуйаана Афанасьевна Дмитриева ытыс таһыныытын ортотугар туттардылар. Улуус уһуйааннарын сэбиэдиссэйдэрин эҕэрдэ суруктарын уонна сертификаттарын Кэнтик нэһилиэгин «Сайыына»уһуйаан сэбиэдиссэйэ Саргылана Михайловна Иванова, «Сказка» (Үөдүгэй), «Кэнчээри»(Нам), «Тускул» (Далыр) уһуйааннар эҕэрдэлэрин, сертификаты «Сказка» уһуйаан директора Феодосия Владимировна Михайлова туттарда.
Уһуйаан үлэһиттэригэр махтанан, ыраахтан — чугастан илии тутуурдаах кэлэн иитиллээччилэр, төрөппүттэр, уһуйааҥҥа үлэлээн сылдьыбыт үлэһиттэр, тэрилтэ салайааччылара эҕэрдэлээтилэр. Үбүлүөйү колхоз яслитын бастакы иитиллээччитэ, норуот хаһаайыстыбатын үтүөлээх үлэһитэ, биир дойдулаахпыт Вера Солдатова — Нанова иһирэх ахтыы оҥорон киэргэттэ. Эҕэрдэлэр быыстарыгар уһуйааммыт иитиллээччилэрэ, оскуола оҕолоро, үлэһиттэрэ үҥкүүлээн, ыллаан үөрүүбүтүгэр үөрүү эптилэр.
Уһуйааммыт иитиллээччитэ, эстрадабыт сулуһа Юрислав Гольдеров иитээччилэригэр махтанан ырыа бэлэхтээтэ уонна 2002 сыллааҕы иитиллээччилэр ааттарыттан бэлэх туттарда. Инникитин даҕаны уһуйааммыт үүнэ — сайда чэчирии турарыгар, ылыммыт былааннара, бырайыактара олоххо киирэн иһэллэригэр баҕарабыт.
Лариса Николаева, оскуола учуутала, Өргүөт
