Ахсынньы 18 күнүнээҕи туругунан, өрөспүүбүлүкэ үрдүнэн былаан быһыытынан сорудахтаммыт 60,7 тыһыынча туонна үүттэн 59,6 тыһыынча туонната туттарыллан, былаан 98,2% тэҥнэспит. Бу туһунан СӨ Тыа хаһаайыстыбатын министиэристибэтэ иһитиннэрэр.
Бүгүҥҥү күҥҥэ үүтү туттарыыга бастакы кэккэҕэ Дьокуускай куорат (3 159,49 тонн) — 120,2%, ол кэннэ Нам улууһа (2 674,27тонн) — 122,1%, Мэҥэ-Хаҥалас (5 573,85 тонн) – 122,7%, Сунтаар (6 928,31 тонн) — 120,69% сылдьаллар.
Ил Дархан Айсен Николаев ааспыт сылга оҥорбут Туһаайыытыгар ыйбыт сорудаҕын толорорго 1 кг үүккэ төлөбүр сыаната үрдэтиллэн, 65 солк. олохтоммута. Биирдиилээн хаһаайыстыбаҕа ынах сүөһү төбөтүгэр төлөнөр суума 39 тыһ. солк. тэҥнэспитэ, оттон хотугу улуустарга бу суума 45 тыһ. солк. буолбута.
«Тыа хаһаайыстыбатын үлэтэ-хамнаһа мин сүрүн болҕомтобор сылдьар. Бу эйгэ сайдыытыттан тыа сирин дьонун олоҕун уйгута эрэ буолбакка, хаачыстыбалаах бородууксуйанан хааччыйыы үлэтэ сайыннаҕына, тубустаҕына өрөспүүбүлүкэ олохтоохторун доруобуйата бөҕөргүүрүгэр төһүү күүс буолуохтаах. Бу сылга тыа хаһаайыстыбатын өйөбүлүгэр 15,8 млрд солк. тыырыллан, хаһан да анамматах үп көрүллүбүтэ. Кэлэр сыл тохсунньу 1 күнүттэн мин сорудахпынан 1 кг үүккэ төлөбүр сыаната үрдэтиллэн, 65 солк. тэҥнэһиэҕэ. Биирдиилээн хаһаайыстыбаҕа ынах сүөһү төбөтүгэр төлөбүр 39 тыһ. солк. олохтонуоҕа, оттон хотугу улуустарга бу суума 45 тыһ. солк. тэҥнэһиэҕэ», — диэн Айсен Николаев ааспыт сылга бэлиэтээн эппитэ.
2024 сылга үүтү туттарыыга субвенция кээмэйэ 3,913 млрд солкуобайга, ол иһигэр бу ыйга эбии көрүллүбүт үп
342,5 мөл. солкуобайга тэҥнэстэ.
Ил Дархан уонна Бырабыыталыстыба пресс-сулууспатын матырыйаалыттан