Тылгыны-Маҥаас нэһилиэктэрин үйэлээх доҕордоһуутун 55 сыллаах үбүлүөйэ

Алаас ааттаах, дойду сурахтаах, эдэрчэгиэн, көрсүө-сэмэй ыччаттардаах икки нэһилиэк доҕордуу 55 сыллаах көрсүһүүтэ быйыл өҥ буордаах, хатыҥ чараҥ алаастардаах, дьоһун дьонноох-сэргэлээх, мааны Маҥаас сиригэр, Харбаала нэһилиэгэр муус устар 6-7 күннэригэр ыытылынна. Маҥаас уонна Тылгыны нэһилиэктэрэ Аҕа уустарынан олус чугастар.Ол иһин икки уруулуу нэһилиэктэр ыччаттара 1968 сыллаахха саас Тылгыны нэһилиэгэр уопсай сүбэнэн, бу нэһилиэктэр көрсүһүүлэрин тэрээһинин  кэлэр күһүҥҥэттэн ыла ыччаттар доҕордуу көрсүһүүлэрин тэрийэн култуураҕа уонна успуорка күрэхтэһиилэрин утумнаахтык ыытарга илии бэрсибиттэрин устуоруйа кэрэһэлиир. Бу маннык үйэлэргэ умнуллубат үтүө суолу киллэрсибит чулуу дьоммутунан Тылгыны нэһилиэгиттэн: Конон Потапов, Василий Борисов уонна Маҥаастан Прокопий, Николай Максимовтар буолаллар.

Көрсүһүү бастакы күнэ

Муус устар 6 күнүгэр ыаллыы нэһилиэкпит Тылгыныбыт дьоно – сэргэтэ,  баһылык Иванов Егор Афанасьевич салайыытынан уонча массыына, 80-ча киһилээх дэлэгээссийэ автоколонна буолан, ытык Маҥаас  сиригэр үөрэ-көтө айаҥҥа турунан, үөрүү-көрүү аргыстаах, сарсыарда 11 чааска ыалдьытымсах Харбаала нэһилиэгэр киирэн кэллилэр. Долгутуулаах түгэни бэлэхтээн, аартыктан уулуссаны биир гына Маҥаас нэһилиэгин дьоно-сэргэтэ  ыалдьыттары илиилэригэр былаахтаах, кэрэчээн саарыктардаах уруйдуу-айхаллыы көрүстүлэр. Уонтан тахса массыына сигнала, үбүлүөйгэ аналлаах умнуллубат түгэни өйгө – санааҕа иҥэрдилэр.  Үөрэ-көтө истиҥник көрсүбүт Маҥаас олохтоохторугар ыалдьыттарбыт барҕа махталларын эттилэр.

Бу кэнниттэн кулууп дьиэҕэ киирэн, регистрация ааһан, минньигэс итии астаах нэһилиэк эдэр хаһаайкалара Мария Егорова, Мария, Татьяна Тимофеевалар ыалдьыттары  буфекка тото-хана аһаттылар.                                                   Эбиэккэ диэри остуол оонньуулара тэтимнээхтик ыытыллыннылар. Күнүс икки чаастан үбүлүөйдээх тэрээһини үөрүүлээхтик чааһын арыйыы буолла. Икки нэһилиэк баһылыктара Егор Иванов, Николай Илларионов, өр сылларга Тылгыны нэһилиэгэр баһылыгынан үлэлээбит, икки нэһилиэк доҕордуу сыһыанын өр сылларга салайсан кэлбит, кэлин Бүлүү улууһун ветеринария управлениетыгар начальнигынан үлэлээбит, тыа хаһаайыстыбатын үтүөлээх үлэһитэ Гаврил Петров уонна урукку Күүлэт сопхуос комсомольскай тэрилтэтин сэкирэтээринэн үлэлээбит, Иосиф Мискяев эҕэрдэ тыл эгэлгэтин эттилэр, доҕордоһуу сыһыан өссө күүһүрдүн, үйэлэртэн – үйэлэргэ ыччаттарбытыгар тэнийэн, күөдьүйэн  истин диэн этиннилэр.

Ньиргиэрдээх музыка арыаллаах, спортивнай оонньуу кыттааччылара парадтаан киирдилэр, ытык-мааны бэтэрээн, урукку көрсүһүүлэр абсолютнай чемпионнара туспа бөлөх буолан, аалай кыһыл лиэнтэлэрин иилиммитинэн инники хааман күрэхтэһиини киэргэттилэр. Күрэхтэһии икки нэһилиэк эмблемалаах былааҕын чулуу спортсмен дьоммут кыырай мэҥэ халлааҥҥа дохсун ытыс тыаһынан доҕуһуоллатан үөһэ кыыратан таһаардылар.                      Дьэ, бу кэнниттэн кэтэһиилээх, өрө күүрүүлээх халбас харата хапсаҕай күрэҕэ, дьону-сэргэни үмүөрү тардан, кулууп дьиэтин саалата ыһыынан-хаһыынан оргуйан олордо.Тустуук уолаттар, ыччаттар олус табыллан, илин-кэлин түсүһэн көрөөччүлэргэ умнуллубат түгэннэри бэлэхтээтилэр.

Сыана үөһээ мас тардыһыытын күрэҕэ, ыйааһыннарынан, эр дьоҥҥо уонна дьахталларга ыытыллан, саала иһэ оргуйан олордо. Мас тардыһыыта киһиттэн илии күүһүн эрэйэр успуорт биир кыраһыабай көрүҥэ буолар. Көрөөччүлэр кыттааччыларга ытыс тыаһын бэлэхтээн, ыһыытаан-хаһыытаан дьоннорун өйөөтүлэр.

Киэһэ анаммыт бириэмэбититтэн арыый хойутаан бырааһынньыкпыт үөрүүлээх чааһа саҕаланан, кулууп дьиэҕэ лыык курдук толору көрөөччү муһунна. Тылгыны  нэһилиэгин салалтата, О.Е. Васильева уонна Г.В. Матвеев «За вклад в развитии Тылгынинского наслега» диэн үрдүк наҕараадалары улахан сыанаҕа туттарда. Икки нэһилиэк баһылыктара доҕордоһуу түһүлгэтэ сайда, кэҥии турдун диэн илии тутустулар. Бу кэнниттэн «Тулхадыйбат доҕордоһуу көмүс долгуннара” диэн икки нэһилиэк 26 нүөмэрдээх эҕэрдэ кэнсиэрин биир тыынынан көрөн сүрдээҕин астынныбыт, дуоһуйдубут. Талааннаах ыччаттарбытынан, сыана бэтэрээннэринэн киэн тутуннубут.

Киэһэтин оскуола дьиэтин киэҥ көрүдүөрүгэр толору, минньигэс астаах сандалы тула олорон бырааһынньык салҕанан түүн оройугар диэри буолла. Орто оскуола директора Алла Михайлова салайааччылаах оскуола кэллэктиибэ ас арааһын, минньигэһин, элбэҕин астаабыттара сөхтөрдө. Чахчы даҕаны үйэлээх, доҕордуу көрсүһүү буоллаҕа.    Ыччат дьон даҕаны,аҕам саастаах ытык-мааны дьоннорбут даҕаны, кулууп дьиэҕэ үҥкүүлээн тэйдибит, астына-дуоһуйа сынньанныбыт.

Күрэхтэһии иккис күнэ

Муус устар 7 күнүгэр оскуола дьиэтин  успуорт саалатыгар кыраҕы харахтаах, сымса туттунуулаах охчуттар илин-кэлин түһүстүлэр. Салгыы тирии мээчиги өрүтэ көтүтэр волейболист ыччаттар волейболга күрэхтэһэн, көрөөччүлэр ыһыытаан-хаһыытаан, сүрдээх тыҥааһыннаах оонньуу буолан ааста. Маҥаас нэһилиэгэ дьахталларга 2 хамаанданы, эр дьоҥҥо 1 хамаанданы туруордулар. Тылгыны нэһилиэгиттэн дьахталлар уонна эр дьоннор хамаандалара күрэхтэстилэр.

Бу кэнниттэн кулууп дьиэ саалатыгар, убаһа бириистээх, хапсаҕайга абсолютнай күрэхтэһии тыҥааһыннаах түгэннэрин көрдүбүт. Испиискэ маһа да батар сирэ суох кулууп иһэ толору киһи. Чахчы даҕаны, дьиҥнээх доҕордоһуу, успуорт бырааһынньыга ньиргийэн ааста. Хапсаҕай абсолютнайа үгүс киһини үмүөрү тардан, ыһыынан-хаһыынан кулууп иһэ оргуйан олордо. Абсолютнай чемпионунан Маҥаас уола Өркөн Григорьев буолан, Тылгыны баһылыга Егор Иванов туруорбут бирииһин ылла.  Хапсаҕай бүтээтин кытта икки нэһилиэк дьоно-сэргэтэ канат тардыһан күүстэрин холоннулар, көрөөччүлэргэ умнуллубат түгэни бэлэхтээтилэр.

Наҕараадалары туттарыы үөрүүлээх чааһа

Икки күннээх тыҥааһыннаах, доҕордоһуу көрсүһүү спортивнай күрэхтэһиитин түмүгэ таҕыста. Успуорт күрэҕэр кыайыы-хотуу, бириистээх миэстэни ылыы элбэх сыраны -сылбаны эрэйэрин спортсмен дьон бары бэркэ билэллэр. Түөскэ кылабачыйар мэтээли иилинэртэн ама ордук туох баар буолуой?! Ону кытта икки нэһилиэк ытык дьоннорун уонна спортсменнарын ааттарыттан туох да баһаам элбэх, сыаналаах бириистэр киирбиттэрэ. Тылгыны-Маҥаас доҕордуу көрсүһүүтүн 55 сылыгар аналлаах,успуорт эйгэтин күүстээхтэрин, сымсаларын, булугас өйдөөхтөрүн билиһиннэрэбит.

Дуобакка дьахталларга 3 м. Петрова Самира (Маҥаас) Маҥаас олохтоох дьаһалтата туруорбут бирииһин ылла. 2 м. Трофимова Алиса(Маҥаас) Тылгыны нэһилиэгин бочуоттаах олохтооҕо Васильев Г.С. туруорбут бирииһинэн наҕараадаланна. 1 м. Григорьева Евдокия (Тылгыны) Тылгыныттан А.Ф.Долгунова туруорбут сыаналаах бирииһин ылла. Эр дьоҥҥо 3 м.Иванов Владислав (Тылгыны), Маҥаас нэһилиэгиттэн анал бирииһи тутта. 2 м. Андреев  Владимир (Тылгыны) Маҥаас нэһилиэгиттэн С.Е. Герасимов туруорбут бирииһинэн наҕараадаланна.1 м. Саввин Василий (Маҥаас), Тылгыныттан Борисов П.П.-Хомдьоо оҕолоро,аймахтара туруорбут сыаналаах бириистэрин туттардылар.

Саахымакка дьахталларга 3 м. Тарасова Туйаара (Маҥаас) анал бирииһинэн наҕараадаланна. 2 м. Григорьева Евдокия (Тылгыны) Маҥаастан Т.Т.Лазарева туруорбут бирииһин ылла.1 м.Трофимова Алиса (Маҥаас) Е.Д.Григорьева анал бирииһинэн уонна Я.Я. Мосов дьонноро туруорбут анал мэтээллэринэн, бириистэринэн наҕараадаланна. Эр дьоҥҥо 3 м. Саввин Василий (Маҥаас) Маҥаас нэһилиэгин кулуубун бирииһин ылла. 2 м.Иванов Николай (Тылгыны) Маҥаастан Н.И.Гаврильев аатыттан харчынан бириис ылла. 1 м. Иванов Петр (Тылгыны) Тылгыныттан Иванов А.Е.оҕолоро туруорбут анал бириистэринэн наҕараадаланна.

Хабылыкка дьахталларга 3 м. Петрова Самира (Маҥаас), Маҥаастан Е.Е. Иванов туруорбут бирииһин ылла. 2 м. Иванова Анастасия (Тылгыны), Г.Г.Петров туруорбут анал бирииһин ылла.1 м.Поскачина Александра (Маҥаас), Е.Н. Егорова уонна Тылгыныттан М.Д.Михайлова анал бириистэринэн наҕараадаланна. Хабылыкка эр дьоҥҥо 3 м. Василий Тутукаров (Тылгыны), Маҥаастан Филиппов Иннокентий анал бирииһинэн наҕараадаланна.2  м. Васильев Егор (Тылгыны) Г.Я. Мосов бирииһин ылла, 1 м. Львов Рустам (Маҥаас) ,Тылгыныттан А.Н. Поскачин анал бирииһинэн наҕараадаланна.

Хаамыска дьахталларга 3 м. Петрова Саргылана (Маҥаас), В.Г.Егорова туруорбут анал бирииһин ылла. 2 м.Львова Оксана (Маҥаас), А.С.Степанова анал бирииһин тутта.1 м.Петрова Самира (Маҥаас), В.А.Андреев туруорбут анал бирииһинэн наҕараадаланна.Хаамыска эр дьон  3 м. Петров Ариан (Тылгыны), А.К.Васильев анал бирииһин, 2 м. Тутукаров Василий (Тылгыны), А.Е.Степанов анал бирииһин ыллылар. 1 м. Львов Рустам (Маҥаас) С.И.Алексеева анал бирииһинэн наҕараадаланна.

Теннискэ дьахталларга 3 м. Львова Оксана (Маҥаас) М.Н. Поскачин анал бирииһин, 2 м. Герасимова Христина (Тылгыны) И.И.Тимофеев анал бирииһин, 1 м. Григорьева Евдокия (Тылгыны) Маҥаас оскуола-саадын бирииһин ыллылар.Теннискэ эр дьоҥҥо 3 м. Андреев Владимир (Тылгыны) инструмент нобуорун бэлэхтээтилэр. 2 м. Михайлов Ариан (Маҥаас) П.Ф.Сметанин туруорбут анал бирииһин тутан үөрдэ. 1м. Степанов Альберт (Тылгыны) Васильев А.Г. анал бирииһин туттардылар.

Ох саа көрүҥэр дьахталларга 3 м. Григорьева Евдокия (Тылгыны), Тылгыны администрациятын бирииһин ылла. 2 м. Михайлова Полина (Маҥаас) Егоров Егор бирииһин ылла. 1 м. Захарова Евгения (Тылгыны) Маҥаас оскуола-саадын анал бирииһинэн наҕараадаланна. Ох саа көрүҥэр эр дьоҥҥо 3 м. Мыскатов Семен (Маҥаас) күлүүс нобуорун ылла. 2 м. Петров Ариан (Тылгыны) Маҥаас нэһилиэгин анал бирииһин ылла. 1м.  Поскачин Михаил (Тылгыны) Маҥаас нэһилиэгэ туруорбут остуолун ылла. Ох сааҕа бэтэрээн дьахталларга 3 м. Иванова Марина (Маҥаас), 2 м. Львова Оксана (Маҥаас), 1 м. Васильева Елена (Тылгыны) буоллулар. Бу кыргыттарга Тылгыны олохтоох дьаһалтатын аатыттан бириистэри туттардылар. Ох сааҕа  бэтэрээн эр дьоҥҥо 3 м. Дмитриев Владимир (Маҥаас) анал бириис ылла. 2 м.Поскачин Игнат (Тылгыны) «Булчут»маҕаһыын сертификатынын тутта.1 м. Григорьев Аян (Тылгыны) 5000 суумалаах  сертфикатынан наҕараадаланна.

Хапсаҕайга 57 кг 3 м.Токоемов Гаврил (Маҥаас) Маҥаастан А.Н.Егоров бирииһин ылла,2 м. Николаев Герман (Тылгыны) Тылгыныттан В.Н. Филиппов уонна Н.Н.Иннокентьев туруорбут  10  тыһ. уу харчынан наҕараадаланнылар. 1 м. Васильев Николай (Тылгыны), Иннокентьев Александр бирииһинэн наҕараадаланна. Хапсаҕайга 65 кг 3 м. Иванов Роман (Маҥаас), Дмитриев Ю.И. аатынан бирииһи тутта. 2 м. Николаев Айаан (Маҥаас), Попов Е.Е. туруорбут уу харчынан 10 тыһ ылла. 1 м.Львов Андрей  (Маҥаас), Петров Д.А. оҕолоро туруорбут телевизор бириистэрин ылла. Хапсаҕайга 75 кг 3 м. Петров Алгыс (Маҥаас), Васильев А.И.туруорбут бирииһин ылла, 2 м.Обутов Константин (Маҥаас), Васильев Е.10 тыһ харчытын ылла, 1 м.Григорьев Алексей (Маҥаас), Дмитриев В.Н.анал  бирииһин , «Ателье мебели» маҕаһыынтан 30  тыһ. суумалаах сертификатынан наҕараадаланна.75 кг үөһээ ыйааһыҥҥа 3 м. Дмитриев Василий (Маҥаас), Кириллов С.Х.аатынан анал бирииһи ылла. 2м. Цыпандин Николай (Маҥаас), Неустроев С.туруорбут быһаҕын ылла. 1 м.Григорьев Александр (Маҥаас), Матвеев Г.В. 10 тыһ.харчынан бирииһин тутан үөрдэ-көттө. Бэтэрээннэргэ 75 кг үөһээ ыйааһыҥҥа 2 м. Васильев Егор (Тылгыны), Федотов Ф.В.аатынан 8 тыһ.ылла. 1 м.Васильев Константин(Тылгыны), Маҥаастан Прокопьев Николай бирииһин ылла. 3 м. Васильев Иван (Тылгыны), Мосов М.А.  анал бирииһин ылла.2 м.Васильев Александр (Маҥаас), Неустроев С.В. туруорбут бирииһин ылла. 1 м. Григорьев Алексей Петров Данил сиэннэрэ туруорбут 20 тыһ.харчытын ылла.

Дьахталларга мас тардыһыыта, 60 кг ыйааһыҥҥа  3 м.Поскачина Диана (Тылгыны), Иванов И.И. оҕолоро туруорбут бириистэрин ылла, 2 м. Михайлова Полина (Маҥаас),Григорьев Константин анал бирииһин тутта. 1 м.Николаева Александра (Маҥаас), Петров Евгений туруорбут 10 тыһ харчытын ылла.Мас тардыһыыта дьахталларга 70 кг ыйааһыҥҥа 3 м.Егорова Маргарита (Тылгыны), Михайлов Иван туруорбут бирииһин ылла. 2 м.Тимофеева Мария (Тылгыны), Иванова М.Е. туруорбут 5 тыһ харчытын ылла.1 м.Степанова Марианна (Маҥаас) Трофимовтар ааттарынан 10 тыһ. харчы ылла. Дьахталларга 70 кг үөһээ ыйааһыҥҥа 3 м.Тимофеева Анастасия (Тылгыны), Аркадий Сергеевич аатынан анал бирииһинэн наҕараадаланна. 2 м. Жиркова Айталина (Маҥаас), Степанов П.Е. 5 тыһ. ылла. 1 м.Григорьева Евдокия (Тылгыны), «Сайдыы түмсүү» аатыттан (Тылгыны), 10 тыһ. харчынан наҕараадаланна. Эр дьоҥҥо мас тардыһыыга, 65 кг ыйааһыҥҥа 3 м. Поскачин Игнат (Тылгыны), Тимофеева В.В.анал бирииһин ылла. 2 м. Николаев Айаан (Маҥаас) Фрейман М.Х бирииһин ылла. 1 м. Кылабысов Айнат (Тылгыны), «Күүлэт» сопхуос салайааччыларын 11 тыһ.  харчытын ылла. Мас тардыһыыга  эр дьоҥҥо 75 кг ыйааһыҥҥа 3 м. Григорьев Алексей (Маҥаас), Саввинова С.Е.  оҕолорун бирииһин ылла, 2 м. Кылабысов Айнат (Тылгыны), Потапов К.Е. аатынан анал бирииһи тутта, 1 м.Обутов Константин (Маҥаас), дружбанан наҕараадаланна. Мас тардыһыыта 75 кг үөһээ ыйааһыннаах эр дьоҥҥо 3 м. Мандаров Мичил (Маҥаас), Павлова Дария туруорбут бирииһин ылла. 2 м. Белолюбскай Евгений (Тылгыны), Васильев С.С. анал бирииһин ылла.  1 м. Мыскатов Мыскат (Маҥаас), Мискяев И.С. , Афанасьев Н.С.анал бириистэрин ылла.

Волейбол дьахталларга  3 м. Маҥаас-2 хамаандата, 2 м. Маҥаас-1 хамаандата, 1 м. Тылгыны хамаандата кыайдылар. Хамаанда бары оонньооччуларыгар бириистэри туттардылар. Волейболга  эр дьоҥҥо 2 м. Тылгыны хамаандата, 1 м.Маҥаас хамаандата ыллылар. Хамаанда бары оонньооччуларыгар бириистэри туттардылар. Волейболга «Бастыҥ оонньооччу»анал ааты ыллылар: дьахталларга Васильева А.М.-Тылгыны, 5 тыһ. уу харчынан тутта. Эр  дьоҥҥо Степанов Т.И. 5 тыһ.уу харчынан ылла. Бирииһи Тылгыныттан Григорьев В.С.  кэргэнэ, бииргэ төрөөбүттэрэ, кинилэр оҕолоро туруордулар.

Анал бириистэри Тылгыны олохтоох дьаһалтатын аатыттан (баһылык Иванов Е.А.)Тылгыны кэскиллээх спортсменнарыгар Петров Ариаҥҥа,Анисимов Николайга бириистэри туттартаата.    РФ культуратын туйгуна, РФ географическай уопсастыбатын  чилиэнэ, журналист, культура бочуоттаах үлэһитэ, тулхадыйбат доҕордоһууну  уһун сылларга салайан, үйэтиппит  Иванов Иван Елисеевич аатынан анал бирииһи, Тылгыны нэһилиэгин  «Түһүлгэ»сынньалаҥ киинигэр (компьютер  уонна сурунаал  остуолларын) уонна Тылгынытааҕы саҥа тэриллибит түмэлгэ эмиэ остуол бэлэхтээтилэр. Бэлэҕи Иван Елисеевич кэргэнэ Мария Кононовна,кыргыттара Изабелла, Степанида , уола Капитон Иванович Ивановтар туттардылар.

Тылгыны — Маҥаас доҕордоһуутун 55 сыллаах үбүлүөйүн түмүк санаатын Тылгыны нэһилиэгин баһылыга Иванов Е.А. эттэ:  — Дьэ, бу курдук, ыалдьытымсах дьоннордоох Маҥаас нэһилиэгин салалтатыгар,олохтоохторугар Тылгыны нэһилиэгин салалтатын уонна дьонун-сэргэтин аатыттан махталбытын тиэрдэбит. Икки уруулуу, доҕордуу нэһилиэк тулхайдыйбат доҕордоһуута өссө күүһүрэн истин,бэйэ-бэйэбитигэр көмөлөсүһэн,сүбэ-ама бэрсиһэн,эдэр ыччаттар, аҕам саастаах дьоннорбут олоххо киллэрбит көрсүһүүлэрин салгыы сайыннара туруохтара диэн эрэнэбит. Нэһилиэкпит салалтатын уонна мин, тус бэйэм ааппыттан, бу 80-ча киһилээх дэлэгээссийэни төттөрү-таары илдьиигэ,аҕалыыга бэйэлэрин чааһынай массыыналарынан таспыт сыыдам сырыылаах суоппардарга махтаныам этэ. Ол курдук, Прокопьев С.И, Долгунов А.С, Васильев И.Е, Петров Р.С, Васильев Е.Г, Поскачин М.А, Мосов М.М,Тутукаров  В.А,Васильев Х.Д, Тутукаров С.В., оскуола  автобуһугар Матвеев П.В, Герасимов Г.П, дьаһалта суоппарыгар Николаев Александрга ,дьоммутун-сэргэбитин таһыыга сүҥкэн көмөнү оҥордугут. Бу улахан тэрээһини тэрийсиигэ көмөлөспүт бары үлэһиттэрбэр, Тылгыныбыт спортсменнарыгар, култуурунай чааһын бэлэмнээбит «Түһүлгэ»сынньалаҥ киин кэлэктиибигэр, бары тэрилтэлэргэ, ас  минньигэһин астаабыт нэһилиэк  Далбар Хотуттарыгар уонна саамай амарах санаалаах, бириистэри туруорбут бука бары дьоммутугар улахан махтал буолуохтун. Нэһилиэкпит олохтоохторо бары бу тэрээһиҥҥэ кылааттарын киллэрдилэр. Бу олус хайҕаллаах дьыала. Икки күннээх доҕордоһуу түһүлгэтэ этэҥҥэ түмүктэнэн ,сыыдам сырыылаах массыыналарбытыгар олорон, дойдубутугар айаннаан кэллибит.

Ыаллыы сытар Маҥаас нэһилиэгин олохтоохторугар бу көрсүһүүнү ис сүрэххититтэн кыһаллан тэрийбиккитигэр Тылгыны дьонун-сэргэтин аатыттан барҕа махталбын тиэрдэбин! Тэрээһин кэмигэр дьоннортон «Бу көрсүһүүнү 5 сыл буолбакка — сылын кыччатыахха» диэн этиилэр киирдилэр. Этиниилэри сөптөөҕүнэн ааҕан, сүбэлэһэн баран, аныгыскы көрсүһүүгэ 2026 сыл муус устарыгар  Тылгыныга ыҥырабыт!

Биһиги инникибит — ыччаттарбыт. Кинилэр түмсүүлээх, сахалыы сайаҕас санаалаах, культураҕа, спортка сайдыылаах, үлэни өрө тутар буоллахтарына — биһиги бары дьоллоох дьон буолабыт. Дойду үрдүнэн араас уларыйыы-тэлэрийии, сайдыы балысхан хардыылара биһигиттэн эмиэ олоххо саҥалыы, сөптөөх  көрүүлэри эрэйэллэр. Итини этэн туран, аныгыскы көрсүһүүгэ культура салаатыттан  фольклорга, хореографияҕа, вокалга уо.д.а. көрүҥнэри зачетка киллэрэн күрэхтэһиэхпит диэн биллэрэбит.

Дьэ, ити курдук, бүтүн Саха сирин да үрдүнэн суох,  икки нэһилиэк Түҥ өрүс түбэтин доҕордуу сыһыана,  үйэлэртэн үйэлэргэ, уота – күөһэ умуллубакка, үтүө дьоммут ааттарын үйэтитэн, ытык дьоммут ыйан биэрбит суолларынан, уостан – уҕараан хаалбакка өссө тэтимирэн,  чолбон сулустуу ыраахтан ыҥыра – угуйа, сыдьаайа туруохтун!

Изабелла Тимофеева,

                                                          Виталина Григорьева       

                                                                библиотекарьдар

 

Читайте дальше