Саҥа Дьылга бэлэх оҥорор Тымныы Моруос оҕонньорго Почтаҕа хааман тиийбэккэ эрэ сурук суруйан ыытыахха сөп буолла. Куйаар ситиминэн сакаастаммыт сурук бэрт түргэнник тиийиэҕэ. Почта үлэһиттэрэ суруктары бэчээттээн таһааран баран 5-7 күн иһигэр Тымныы оҕонньор дьиэтигэр тиксэриэхтэрэ.
Электроннай суругу Госуслуга сыһыарыытын нөҥүө https://zakaznoe.pochta.ru/ сайтка бэлиэтэнэҕит, оччоҕо экраҥҥа «Письмо Деду Морозу» диэн сурук тахсыаҕа. Аадырыскыт толору суруллан биэриэҕэ, суруккутун докумуон, хаартыска курдук уган кэбиһиэххитин сөп эбэтэр бэлэм сурукка бэйэҕит баҕа санааҕытын киллэрэн биэрэҕит.
Дойду оҕолоро Тымныы Моруос оҕонньорго сурук суруйаллара номнуо үгэс кэриэтэ. Уруккулуу кэмбиэргэ уган эмиэ суруйар үгэстээх ыал элбэх. Дойдубут улахан куораттарыгар оҕолор суруктарыгар анаан Почта дьааһыктара бэлэм тураллар.
Тымныы оҕонньор дьиэтин аадырыһын бэлиэтэнэн кэбиһиҥ: 162390, Россия, Вологодская область, город Великий Устюг, «Дом Деда Мороза».
«Үөһээ Бүлүү» хаһыат
