Бүгүн, ахсынньы 6 күнүгэр, Үөһээ Бүлүү нэһилиэгин киинин киин болуоссатыгар общественнай-политическай деятель Исидор Барахов уонна соратниктара Үс Кыһыл Знамя орденнаах төлөннөөх революционер, хамандыыр Иван Строд, Забайкальскай уобаласка уонна Саха сиригэр буолбут гражданскай сэриилэр кыттыылаахтара Сергей Широких-Полянскай сырдык уобарастарын көрдөрөр пааматынньыгы арыйар үөрүүлээх түгэн буолла.
Автономия ылыллыан аҕай иннинээҕи 1922 сыл, кулун тутар (март) 10 түүнүгэр оҥорбут былааһы уларыппыт (переворот), саха норуотун олоҕор тосту уларытыыны киллэрбит, кыһыл террору тохтоппут, өрө турааччыларга амнистия таһааран сэбиэт былааһын утары турбут хамсааһыны хаан тохтуута суох тохтоппут — бу Барахов соратниктарын кытары оҥорбут переворота.
Тэрээһиҥҥэ СӨ Тутуу миниистирэ Виктор Романов, Үөһээ Бүлүү нэһилиэгин баһылыга Максим Силигиянов, Ил Түмэн депутата Владимир Поскачин, улуус уопсастыбаннаһа кыттыыны ылллылар. Тутуу миниистирэ Виктор Дмитриевич мустубут дьону эҕэрдэлээн туран, бу болуоссакка аҕам саастаах дьон, оҕо-аймах кэлэн сынньанар сирэ буолуо, ону тэҥэ уһулуччулаах дьоммутугар арыллыбыт пааматынньык история кэрэһитэ буолан дьону түмэ турарыгар баҕарда.
Нэһилиэк баһылыга Максим Филиппович бу тутуллубут болуоссакка минньигэс астаах кафе, оҕолорго оонньуур сир арыллыахтара диэн бэлиэтээтэ уонна нэһилиэк бырааһынньыктара манна буолуохтара диэн кэпсээтэ. Итини этэн туран, үөрүүлээх быһыыга-майгыга Виктор Дмитриевичка махтал суругу кытары өйдөбүнньүк бэлэхтэри туттарда. Ил Түмэн депутата Владимир Поскачин пааматынньык историятын билиһиннэрдэ, кини саҕалаабыт дьыалата тиһигин сиппитин, Исидор Барахов соратниктарыгар анаммыт пааматынньык республика үрдүнэн суоҕун бэлиэтээтэ. Пааматынньык ааптара – биир дойдулаахпыт, скульптор Николай Чоччасов буолар, анал сакааһынан оҥорбут үлэтэ.
«Үөһээ Бүлүү» хаһыат
