Бүгүн улуус дьаһалтататын аактабай саалатыгар орто үөрэхтээх мэдиссиинэ каадырдарын бэлэмниир 4 өрүттээх сөбүлэҥ түһэрсии үөрүүлээх түгэнэ тосхойдо. Ол курдук, Үөһээ Бүлүү улууһун баһылыга Валерий Николаев, В.А.Вонгродскай аатынан Дьокуускайдааҕы медицинскай колледж дириэктэрэ Дмитрий Алексеев, улуустааҕы киин балыыһа кылаабынай бырааһа Сардаана Павлова уонна Д.С.Спиридонов аатынан улуустааҕы гимназия дириэктэрэ Сергей Кардашевскай ытыс дохсун тыаһынан докумуоннарга илии баттастылар.
Дьокуускайдааҕы медицинскай колледж дириэктэрэ Дмитрий Алексеев иһитиннэрбитинэн, улууска арыллар медицинскэй колледж отделениета өрөспүүбүлүкэ үрдүнэн 15-с буолар. «Бастатан туран, бу отделениеҕа кэккэ биричиинэлэринэн эрдэ үөрэммэтэх ыал ийэлэрэ, идэлэрин уларытыан баҕалаах дьоҥҥо олус үчүгэй дии саныыбын. Дьиэлэрин таһыгар үөрэнэн, идэлэнэн, салгыы балыыһаларга үлэлиэхтэрэ диэн эрэллээхпин. Медсестра идэтигэр 1 сыл 10 ый, фельдшер идэтигэр 2 сыл 10 ый үөрэнэҕит, ону таһынан стипендия көрүллэр», — диэн Дмитрий Афанасьевич эҕэрдэ тылыгар эттэ.
Медицинскай колледж отделениета Д.С.Спиридонов аатынан улуустааҕы гимназия баазатыгар арыллаары турар. Ыраата барбакка, үүнэр сыл тохсунньутугар манна колледж преподавателлэрэ кэлэн үлэни кытары билсиэхтэрэ, сиделка, массажист, косметолог курдук наадалаах идэлэргэ быстах куурустары ыытар былааннаахтар.
«Үөһээ Бүлүү» хаһыат