“Азия оҕолоро” норуоттар икки ардыларынааҕы спорт VIII оонньууларыгар 1 900 волонтер 19 хайысхаҕа арахсан үлэлии сылдьар. Бу тас дойду делегацияларын уонна Арассыыйа оройуоннарын атташелара, үөрэҕирии уонна култуура бырагырааматын, көрсүү-атаарыы, хааччыйыы, транспорт уонна олохтооһун о.д.а волонтердара.
Дьокуускай куорат 31-с нүөмэрдээх оскуолатын үөрэнээччитэ Анатолий Архипов волонтер-атташе миэстэтигэр сүүмэрдээһини ааһан, Таиланд спортсменнарын уонна тренердэрин кытта үлэлэһэ сылдьар.
“Мин Таилантан сылдьар ыспарсымыаннары кытта аангылыйа тылынан алтыһан үлэлиибин. Сүрүн эбээһинэһим кинилэри арыаллааһын, барытын сирдээн, көрдөрөн биэрии. “Атташе” диэн волонтердааһын хайысхата оонньуу кыттыылаахтарын кытта быдан чугастык алтыһарга сабыдыал буолар. Сарсыарда эрдэттэн киэһэ хойукка диэри үлэлиирим да иһин, атташе үлэтин олус сөбүлээтим уонна олус сэргэх дии санаатым. Кэлии омуктар майгыларын, олоххо көрүүлэрин, уратыларын барытын өйдөөн хаалыам дии саныыбын. Таецтар сүрдээх сэмэй омук буолан, ирэ-хоро алтыһыыбыт тута тахсан испэтэҕэ, эрээри сыыйа-баайа чугасыһан доҕордостубут. Азия оҕолоро» оонньууларга волонтердааһын туһунан доҕотторбуттан истибитим уонна аангылыйа тылын көҥүллүк билэр буоламмын, «Тас дойду делегацияларын атташета» диэн хайысхаҕа киирсэргэ санаммытым. Маннык улахан хабааннаах норуоттар икки ардыларынааҕы оонньууларга кыттыспат диэн бэйэбэр улахан сыыһа буолуо этэ. Бачча улахан тэрээһин сорҕото буоларбыттан бэйэбин киэн туттабын уонна үөрэбин! », — диэн үллэстэр Анатолий Архипов. Анатолий бэлиэтээн этэринэн, волонтердааһын эйгэтин кини бэйэтигэр былырыын саҥа арыйбыт, онтон ыла дьоҥҥо көмөлөһөрүн ис сүрэҕиттэн сөбүлээбит.
“Азия оҕолоро” норуоттар икки ардыларынааҕы спорт VIII оонньуулара бэс ыйын 26 күнүттэн от ыйын 7 күнүгэр диэри ыытылла тураллар. Бу тэрээһиҥҥэ 24 араас дойдуттан 30 хамаанда кыттыыны ыла сылдьар. Дойду баһылыга Владимир Путин оонньуу кыттыылаахтарыгар эҕэрдэ тылын этэригэр тэрийии уонна айар үлэ үрдүк таһымнааҕын бэлиэтээтэ.
СӨ Бырабыыталыстыбатын уонна Ил Дархан пресс-сулууспатын матырыйаалыттан