Дойдубут Президенин быыбара биһиги улууска хайа да дьыллааҕар өрө көтөҕүллүүлээхтик, үрдүк таһымнаахтык ааста. Ол курдук, өрөспүүбүлүкэ үрдүнэн 10 иһигэр киирдибит. Дьоммут дойду үрдүнэн ыытыллар үлэлэри сыаналаан уонна бу ыарахан кэмнэргэ дойдубут Президенин күүскэ өйөөтөхпүтүнэ эрэ биирдэ дойдубут сайдыаҕын, инникитэ эрэллээх, арҕааҥҥы тас дойдулартан көмүскэллээх буолуоҕун хаһааҥҥытааҕар да сөпкө өйдөөннөр, маннык түмсүүлээхпитин көрдөрдүбүт.
Улууспут аҕа баһылыга Валерий Валерьевич Николаев бэйэтин хамаандатын кытта нэһилиэктэринэн, тэрилтэлэринэн сылдьаннар, дойдубут Президенэ Владимир Путин ыытар араас хайысхалаах үлэтин сырдатаннар, кини Сахабыт сиригэр улахан болҕомтотун уурарын, Ил Дархаммытын Айсен Николаевы күүскэ өйүүрүн туһунан кэпсээтилэр. Өрөспүүбүлүкэбит үрдүнэн инникитин элбэх баараҕай тутуулар ыытыллыахтарын, араас көрүҥнээх бырагыраамалар, национальнай бырайыактар өссө эбиллэн, элбэх көмө оҥоһуллуохтааҕын бар дьон чугастык ылынарын курдук тиэрдии түмүгэр маннык үрдүк ситиһиилэннибит. Ону тэҥэ билиҥҥи байыаннай дьайыы кэмигэр патриотическай өй-санаа уһуктан, дьоммутун күүскэ түмтэ. Биллэн туран, үгүс дьону түмэ тардарга куйаар араас ситимэ уонна сөбүлээн ааҕар олохтоох “Үөһээ Бүлүү” хаһыаппыт сүҥкэн оруолу ылаллар. Түгэнинэн туһанан, дойдубут Президенэ Владимир Путины быыбарга күүскэ өйөөн, бэйэҕит куоласкытын биэрбит улуус олохтоохторугар барыгытыгар чугас дьоннорум, коллегаларым ааттарыттан барҕа махталбын тиэрдэбин. Куруутун маннык түмсүүлээх буоларгытыгар, чаҕылхай сааскы халлааммыт курдук сайаҕас санааны, иллээх олоҕу, үгүс ситиһиилэри, дьолу-соргуну баҕарыам этэ.
Василий Титов, Үөһээ Бүлүүтээҕи айылҕа ураты харыстанар сирдэрин старшай государственнай инспектора