Муус устар 11 күнүгэр Кыырт Далыгар «Эйгэ» култуура, спорт, этнография комплексын тэрилтэтэ уонна улуустааҕы Киин балыыһа «Ыччат доруобуйата — инники кэскил кэрэһитэ» диэн тиэмэҕэ үрдүкү кылаас үөрэнээччилэригэр, кылаас салайааччыларыгар тэрээһин ыыттылар.
Саха халандаарынан Айыыһыт сылыгар Айыыһыт ыйыгар, Оҕо саас, Дьиэ кэргэн сылларыгар бэйэ этин-хаанын оҕо эрдэхтэн харыстанан, чөл доруобуйалаах, кэскиллээх киһи буоларыгар анаан бу тэрээһини тэрийдилэр.
Киин балыыһаттан хирург-быраас Абдель Жауд Раиз Ахмед, акушер-гинеколог Александра Колесова, профилактика кабинетын бырааһа Светлана Алексеева, удьуор алгысчыт Трофим Миронов кыттыыны ыллылар.
Александра Николаевна кыргыттары аһаҕас кэпсэтиигэ ыҥырда. Кэпсэтиигэ улахан кылаас кыргыттара кытыннылар. Чуолаан бэйэни ыраастык туттуу, сайдыы, кыыс, уол сыһыанын, араас ыарыылар, сыыһа тутуннаххына туох буолуон сөбүн о.д.а кэпсээтэ. Кыргыттар интэриэһиргиир боппуруостарыгар хоруйдары ыллылар.
Уолаттарга туспа балаҕаҥҥа хирург быраас Абдель Жауд Раиз Ахмед уол оҕо доруобуйатын туһунан кэпсээтэ.
Киин балыыһа профилактическай кабинетын бырааһа Светлана Тимофеевна кыргыттарга көнөтүк туттан хаамарга, осанканы тутарга, сөптөөхтүк тыынары көрдөрдө. Ону таһынан кыргыттарга, уолаттарга «Ыччат доруобуйата — инники кэскил кэрэһитэ» лекцияны аахта. Оҕолор болҕойон олорон иһиттилэр.
Удьуор алгысчыт Трофим Миронов оҕолору алгыстаата, кэлэр кэнчээри ыччат чөл олохтоох, бигэ туруктаах киһи буола улааталларыгар алгыһын тиэртэ.
«Эйгэ» тэрилтэ Саха итэҕэлин тарҕатар, нэһилиэнньэҕэ анаан араас иһтэриэһинэй, сонун тэрээһиннэри ыытар. Бүгүҥҥү тэрээһин кэнчээри ыччаппыт бигэ, чөл туруктаах буола улааталларыгар ананна. Оҕолор бэйэлэригэр туһалааҕы, наадалааҕы иҥэриммиттэрэ буолуо диэн эрэнэбит.
Мария Васильева