Балаҕан ыйын 18 күнүгэр улуус дьахталларын сүбэ түмсүүтэ бэрэссэдээтэл Ольга Тумусова салайааччылаах сыллааҕы үлэ былаанын торумнаатылар. Президиумунан талыллыбыт улууспут Далбар Хотуттара хас биирдии нэһилиэктэринэн үллэстэн сүбэ түмсүүлэри кытта үлэлэһэргэ былааннаннылар. Нэһилиэктэр дьаһалталарыгар быһа сибээскэ тахсан бу ыйтан үлэни саҕалыахтара.
Саха өрөспүүбүлүкэтин дьахталларын Сойууһа тэрийэр киэҥ үлэлэрин кытта тэҥҥэ хаамсар тэрээһиннэри ыытарга сүбэлэстилэр. Билигин улууска ыытылла турар Доруобуйа харыстабылын улахан бырайыагар кыттыһан, хас оптуорунньук аайы Үөһээ Бүлүүтээҕи устуоруйа уонна этнография түмэлин Түмэр саалатыгар эмтээх чэйдэри астыырга маастар-кылаастары ыытыахтара, маны таһынан эккэ-хааҥҥа туһалаах сүбэлэри, хамсаныылары анаммыт спикердар көрдөрүөхтэрэ.
«Сүүс үтүө дьыала» диэн бырайыак улуус үрдүнэн үлэлиир, бу хамсааһыны дьахтар түмсүүтэ көҕүлүүр, онон улууспут кэрэ аҥардара дьон-сэргэ, оҕо-аймах, төрөөбүт дойдуларын туһугар туох эмит үтүө дьыаланы тэрийэр, көҕүлүүр үлэлэрэ үксүө диэн эрэнэбит.
Улууспут киинин кэрэ аҥардарын туруктарын тупсарар, олохторун киэргэтэр, эрэйдэрин чэпчэтэр сыаллаах-соруктаах улахан түмсүүгэ кыттыһарга ыҥыраллар!
Изабелла Саввинова