Ахсынньы 16-17 күннэригэр хапсаҕайга Федерация кубога ыытыллан, Саха сирин дьонугар успуорт өрөгөйдөөх бырааһынньыга буолла. Хапсаҕай түһүлгэтигэр халбас харата хамсаныылар, араас аҕыс уон аҕыс албастар, сып-сап, сылбырҕа туттунуулар, оо, көрөргө кыраһыабай да тустуулар буоллулар!
Саха дьоно сылы быһа кэтэһэр тустуулара Федерация кубогын тустуута дьэ, чахчы сахаларга хапсаҕай үрдүкү кэрдиискэ турарын көрдөрдө. Оттон чопчу биһиэхэ, Үөһээ Бүлүүгэ, улууспут хамаандатыгар ыалдьан хас биирдии ыалга телевизорга, төлөппүөҥҥэ мамонт, НВК, iron блог ютуб ханаалларынан ыһыылаах-хаһыылаах, өрүтэ ыстанан ылыылардаах тустуу көрүүтэ буолла. Улууспут дьоно биир киһи курдук түмсэн, Үөһээ Бүлүүтүн хамаандатын хас биирдии тустуугун кыайыытыттан кынаттанан, хотторуутуттан хомойон, хас киирсиитигэр тэҥҥэ ыалдьан, күүрэн, күүркэйэн ылан, ойон тура-тура олорон, дьиҥ-чахчы хапсаҕай хааммытыгар, сүрэхпитигэр иҥэн сылдьарын, маннык түгэннэргэ дьиҥ-чахчы Үөһээ Бүлүүлэр тылынан кыайан этиллибэт тулхадыйбат таас хайа курдук түмсүүлээхпитин, бэйэ-бэйэҕэ эрэллээхпитин өссө биирдэ өйдөөтүбүт.
Хапсаҕайга Федерация кубогар бу иннинэ 5 төгүл муҥутуур кыайыы өрөгөйүн билбит Үөһээ Бүлүү хамаандата быйыл 26-с төгүлүн ыытыллар Федерация кубогар 6-с төгүлүн муҥутуур кыайыылаахтарынан буоллулар! Бу сытыы, бу чаҕылхай киирсиилэр хас биирдиибитигэр хатыламмат хартыына, чаҕылхай чыпчылҕан түгэннэр буолан өйбүтүгэр-сүрэхпитигэр иҥнилэр, инникитин да уостан түспэккэ кэрэ кэпсээн буолан кэлэр кэнчээри ыччакка кэпсэнэ туруохтара.
Улууспут успуордун управлениетын сала йааччыта Егор Николаев уонна хапсаҕайбыт былааҕынан буолар тустууктарбыт, тренердэрбит Платон Саввинов, Увар Тимофеев, Михаил Егоров биир сүбэнэн талбыт, таҥмыт хамаандалара чахчы күүстээҕин көрдөрдө. Телевизорынан көрө олордоххо, саала иһигэр биир дойдулаахтарбыт тоҕу анньан кэлэн, «Үөһээ Бүлүү-өрүү үөһээ! Өрүү үөһээ- Үөһээ Бүлүү!» диэн бары сөбүлээн туттар лозуммутун өрө тутан, ыһыы-хаһыы, үөрүү-көтүү өрөгөйүн биллэрэн, биир дойдулаахтарбытыгар “ыалдьан” ураты сылаас тыыны олохтообуттара эмиэ тустууктарбытыгар эбии күүһү, эрэли, тирэҕи биэрбитэ саарбаҕа суох.
Дьэ, тыҥааһыннаах киирсиилэр кэннилэриттэн чаҕылхай кыайыы биһиги улууска итэҕэтиилээхтик кэллэ ! Бу –барыбыт үөрүүбүт, кыайыыбыт, өрөгөйбүт!!! Үөһээ Бүлүү — өрүү үөһээ, өрүү үөһээ – Үөһээ Бүлүү!!!
Валентина ФИЛИППОВА
