Ааспыт Дойду Президенин талар быыбар түмүгүн туһунан Үөһээ Бүлүүтээҕи Территориальнай быыбардыыр хамыыһыйа бэрэссэдээтэлэ Семен Миронов иһитиннэрдэ.
— Үөһээ Бүлүү улууһугар 34 учаастактааҕы быыбардыыр хамыыһыйа харгыһа суох үлэлээтэ. Сокуону кэһии бэлиэтэммэтэ. Бэҕэһээ киэһэ 22:40 чааска боротокуол баттанан Дьокуускай куоракка Киин быыбардыыр хамыыһыйа ыытыллыбыта. Быыбардааччы уопсай ахсаана 9973 киһи эбит буоллаҕына, 8249 киһи быыбарга тахсан, 82,71% ситистибит. 4 нэһилиэк 100% быыбарга кытынна. Баһыйар элбэх куолаһы дьон Владимир Путиҥҥа биэрэн, 91,70% ылла. Бу көрдөрүү өрөспүүбүлкэ таһымыгар 5-с миэстэҕэ сылдьар.
Онтон атын кандидаттар көрдөрүүлэрэ:
Владислав Даванков — 2,44%, Леонид Слуцкий — 0,80%, Николай Харитонов — 4,57%
Үөһээ Бүлүү улууһун баһылыга Валерий Николаев бэйэтин телеграмм-ханаалыгар быыбардааччыларга махтанна:
-
Үөһээ Бүлүү улууһа Владимир Владимирович Путиҥҥа 91,70% куолаһы биэрэн, Саха Сиригэр 10 бастыҥ көрдөрүүлээх улуустарга киирдэ. Бу үрдүк көрдөрүү биһиги улууспут дьонун-сэргэтин түмсүүлээх санаатын, Президиэҥҥэ үрдүк итэҕэлин көрдөрдө. Быыбарга кэлэн көхтөөх кыттыыны ылбыт быыбардааччыларга, Быыбары үрдүк таһымнаахтык ыыппыт быыбардыыр хамыыһыйаларга Быыбар ситиһиилээх түмүктэниитинэн, үрдүк көрдөрүүтүнэн эҕэрдэлиибин уонна махтанабын.
«Үөһээ Бүлүү» хаһыата
