Балаҕан ыйын 6 күнүгэр Дьарыктаах буолуу киин «Работа России» офиһыгар үлэ дьаарбаҥката тэрилиннэ. Манна Үөрэх управлениетыттан, Үөһээ Бүлүү нэһилиэгин дьаһалтатыттан, ОДьКХ филиалыттан, «Теремок» оҕо уһуйааныттан, ИДьМ Үөһээ Бүлүү отделыттан, улуустааҕы киин балыыһаттан, «Мин докумуоннарым» элбэх хайысхалаах киин тэрилтэтиттэн, социальнай көмүскэл управлениетыттан туһааннаах специалистар кэлэн үлэ көрдүүр дьоҥҥо тэрилтэлэригэр баар үлэ миэстэлэрин билиһиннэрдилэр.
Саамай элбэх үлэ миэстэтэ үөрэх управлениетыгар аһаҕас турар. Ол курдук, улууспут хас биирдии нэһилиэктэригэр, оскуолаларга учууталлар, уһуйааннарга иитээччилэр тиийбэт. Ону тэҥэ улуустааҕы киин балыыһаҕа эмиэ быраас тиийбэтэ тыын боппуруос быһыытынан турар. Уһун болдьоххо үлэлииргэ Өргүөт уонна Туобуйа нэһилиэктэригэр уонна улуус киинин поликлиникатыгар учаастактааҕы терапевт быраас миэстэлэрэ баар. Маны таһынан улуус хирура суох олорор, ол быһыытынан, ыксаллаах быһыы-майгы тахсар түгэнигэр эбэтэр былааннаах эппэрээссийэҕэ барар ыарыһахтары ыаллыы улуустарбытыгар Ньурбаҕа уонна Бүлүүгэ санитарнай рейсэ көрдөһөн ыытарга күһэллэллэр. Ону тэҥэ эндоскопист, кардиолог, трансфузиолог, анестезиолог, оҕо сытар балыыһатын педиатра, неонатолог уонна икки улуус киинин оҕо поликлиникатыгар 2 педиатр миэстэлэрэ аһаҕас тураллар.
Маны таһынан Сургуулук, Кырыкый, Маҥаас, Харбалаах, Дүллүкү, Дүллүкү, Тамалакаан нэһилиэктэрин быраас амбулаториятыгар фельдшердэр наадалар. Нам нэһилиэгиттэн төрүттээх Валентина Шарапова быйыл төрөөбүт нэһилиэгэр үлэлии кэлэн, намнар фельдшердэнэн үөрэн олороллор.
Итиэннэ быстах кэмҥэ, ол эбэтэр үлэлии олорбут быраас оҕолонон олорор кэмигэр солбуоһук үлэҕэ медиктэр ирдэнэллэр. Ол курдук, эндокринолог, тиис бырааһа, Дүллүкү нэһилиэгэр учаастактааҕы терапевт быраас уонна фельдшер миэстэлэрэ аһаҕас тураллар.
Үлэлии кэлэр быраастарга нэһилиэктэр баһылыктара олорор дьиэнэн хааччыйаллар. Дьиэ куортамнаһар түгэннэригэр куортам 50% компенсация быһыытынан төлөнөр. Итиэннэ «Земскэй быраас» уонна «Земскэй фельдшер» бырагыраамаҕа киирсэр усулуобуйа баар.
Бүгүҥҥү күҥҥэ улуус дьаһалтатыгарүс үлэ миэстэтэ тахсыбыт. Ол курдук, Үп-харчы управлениетыгар үрдүк үөрэхтээх кылаабынай специалистка наадыйаллар, Ыччат политикатын отделыгар — сүрүннүүр специалист, үөрэх управлениетын эбии үөрэхтээһин уонна иитии отделыгар — кылаабынай специалист уонна улуустааҕы дьокутааттар Сэбиэттэригэр сэкирэтээр миэстэтэ баар. Интэриэһиргээбит дьон улуус дьаһалтатыгар тиийэн билсиэххитин сөп.
Олох-дьаһах, коммунальнай хаһаайыстыба тэрилтэтигэр тутууга уонна өрөмүөҥҥэ эппиэтинэстээх сүрүннүүр инженер миэстэтигэр үлэһит көрдүүллэр. Ону тэҥэ инженер-теплотехник, хочуолунай хаһаайыстыба электромонтера уонна суоппар миэстэлэрэ аһаҕас тураллар. Электростанция тэрилтэтигэр 4-с разрядтаах суоппарга уонна электромонтерга наадыйаллар.
Полиция отделыгар суоппар бырааптаах аармыйаҕа сулууспалаабыт эдэр киһини үлэҕэ ыҥыраллар. Билиҥҥи туругунан икки суоппар идэлээх киһи наада, уона таһынан холуобунай розыск отделениетыгар опер боломуочуйалаахха наадыйаллар. Манна эмиэ сүрүн ирдэбил — аармыйаҕа сулууспалаах буолуохтаахтар.
Итиэннэ Дьарыктаах буолуу киинин нөҥүө анал байыаннай дьайыыга хантыраак баттаһан сулууспалыы барыан баҕалаахтары күүтэллэр. Бу туһунан тэрилтэ салайааччыта Николай Петровтан сиһилии билсиэххитин сөп.
Кристина Яковлева