Бүгүн, балаҕан ыйын 10 күнэ — Школьная 3/1-3/2 саҥа, элбэх квартиралаах, 4 этээстээх таас дьиэлэр аһыллар ураты үөрүүлээх, кэтэһиилээх, долгутуулаах күннэрэ!
Үөһээ Бүлүү бөһүөлэгэр саахалланар туруктаах уонна хаарбах дьиэлэриттэн көһөрүү федеральнай программанан муниципальнай контракт түһэриллэн, үлүскэннээх үлэ баран, түөрт мэндиэмэннээх, 76 икки дьиэ тутуллан, хаһаайыттар саҥа дьиэлэрин боруогун атыллаан киирдилэр. Бу дьиэлэри эдэр тутааччы Евгений Данилович Корякин «ВВК групп» тэрилтэтэ толору хааччыллыылаах, аныгылыы тупсаҕай дьиэлэри хаачыстыбалаахтык тутан үлэҕэ киллэрдилэр.
Улуус ытык-мааны алгысчыта Трофим Миронов сахалыы сиэринэн айах тутан, Үрдүк Айыылартан көрдөһөн-ааттаһан, саҥа дьиэлэр дьоллоох, этэҥҥэ холумтаннаах буолалларыгар кэс тылын эттэ, мустубут дьону күөх унаар буруонан арчылаата.
Улуус баһылыгын социальнай боппуруостарга солбуйааччыта Анна Уларова саҥа дьиэлэр хаһаайыттарыгар итии-истиҥ эҕэрдэтин тиэрдэн туран, тутааччы Евгений Корякиҥҥа улуус баһылыгын аатыттан махтал суругу туттарда. Салгыы бэйэлэрин эҕэрдэлэрин уонна үтүө баҕа санааларын Үөһээ Бүлүү бөһүөлэгин баһылыгын солбуйааччы Егор Михайлов уонна саҥа дьиэ олохтоохторун ааттарыттан Валентина Афанасьева тириэртилэр. Саҥа дьиэлэр символическай күлүүстэрин Егор Владимирович Евгений Корякиҥҥа үөрүүлээх быһыыга-майгыга туттарда.
Үөрүүлээх күн бэлиэ түгэнигэр саҥа дьиэҕэ киирэр аалай лиэнтэни Анна Михайловна Уларова, Егор Владимирович Михайлов, Евгений Данилович Корякин уонна Валентина Васильевна Афанасьева кырыйан, олохтоохтор үөрүүлэрэ үс бүк үрдээтэ, саргы дьаалы салалынна!
«Үөһээ Бүлүү» хаһыат
