Улууска «Доруобуйа күнэ» бырайыак чэрчитинэн, бүгүн, оптуорунньукка, үгүс тэрээһиннэр ыытылыннылар.
«Үс Хоһуун» стадион манеһыгар Софронов Николай Васильевич сарсыардааҥҥы сэрээккэни ыытта. Тэрийээччилэр бэлиэтииллэринэн, манежка буолар оптуорунньуктааҕы сэрээккэ үтүө үгэскэ кубулуйуохтаах. Маны таһынан, улууспут үгүс тэрилтэлэригэр үлэһиттэр сарсыарда аайы 15 мүнүүтэни доруобуйаларыгар аныыр буолбуттара хайҕаллаах.
Спорт управлениетын үлэһиттэрэ буулдьанан ытыыга, дартска, чэпчэки атлетикаҕа, сахалыы остуол оонньууларыгар маастар-кылаастары ыыттылар.
«Олонхо» дьиэтигэр доруобуйатынан хааччахтаах дьоҥҥо, нэһилиэнньэҕэ анаан Төрүт дорҕоон көмөтүнэн өйү-санааны чэбдигирдэр медитация ыыттылар.
«ВИЛЮЙ» рынок иннигэр көһө сылдьар медицинскай комплекс туран баҕалаах дьон доруобуйатын көрдүлэр-иһиттилэр (диспансеризация).
Улуустааҕы киин библиотекаҕа
анал сертификаттаах Андреева Вера Афанасьевна сүһүөх гимнастикатын ыытта, чэбдигириигэ литература көмөтүн тула кэпсэтии буолла.
Нэһилиэктэргэ барытыгар чэбдигирдэр сэрээккэлэр, скандинавскай хаамыы, спортивнай күрэхтэр, лекторийдар буоллулар. Сонун тэрээһини Ороһу бибилэтиэкэтэ ыытта: планкаҕа туран эрэн кинигэ ааҕыытын күрэҕэ дьон сэҥээриитин ылла.
Улууспут олохтоохторун нэдиэлэ аайы ыытыллар Доруобуйа күнүгэр көхтөөх кыттыыны ыларгытыгар ыҥырабыт! Бииргэ доруобай буолуоҕуҥ, чөл олоҕу талыаҕыҥ!
«Үөһээ Бүлүү» хаһыат
