Балаҕан ыйын 21 күнүгэр «Үс Хоһуун» стадиоҥҥа көҥүл тустууга вольнай стильга супер ыарахан ыйааһыҥҥа тустар Азия чемпионун, элбэх төгүллээх призерун, Олимпийскай оонньууларга үс төгүллээх кыттыыны ылбыт норуоттар икки ардыларынааҕы кылаастаах спорт маастарын, киэн туттар биир дойдулаахпыт Айаал Петрович Лазаревы чиэстээһин буолла.
Айаал Лазаревы чиэстээһин өрөгөйдөөх чааһыгар улуус баһылыга Валерий Николаев, Тамалакаан нэһилиэгин баһылыга Петр Иванов, Нам нэһилиэгин баһылыга Александр Кардашевскай, спорт управлениетын начальнига Егор Николаев уонна улуус культураҕа департаменын, кииннэммит библиотечнай ситим, история уонна этнография музейын, Н.И. Бойлохов аатынан оҕо искусство оскуолатын, единоборство оскуолатын салайааччылара, истиҥ-иһирэх эҕэрдэлэрин тириэртилэр. Баһылыктар Айаал Петровичка улуус киинигэр уонна Тамалакаан нэһилиэгэр уһаайбалары бэлэхтиир туһунан сертификаттары үөрүүлээх быһыыга-майгыга туттардылар уонна «Тамалакаан нэһилиэгин бочуоттаах олохтооҕо» үрдүк ааты иҥэрдилэр.
«Үөһээ Бүлүү» хаһыат
