“Үөһээ Бүлүү улууһа” муниципальнай оройуон дьаһалтатын аатыттан уонна тус бэйэм Эһигини Норуоттар икки ардыларынааҕы кэрэ аҥаардар күннэринэн итиитик-истиҥник эҕэрдэлиибин!
Саха сиригэр бу сааскы маҥнайгы бырааһынньык ананар дьиэ кэргэн туллар тутаахтарыгар – ийэлэргэ, эбэлэргэ, эдьиийдэргэ, балыстарга, кыргыттарга.
Үрүҥ күн, ийэ сир Таҥаралара – Эһиги, уйгуну-быйаҥы олохтооччу, саха омугу самныбат саргылаабыт, кэхтибэт кэскиллээбит, улуу моһоллорго эр дьонтон хаалсыбакка, өстөөҕү үтэйсибит, кыһалҕаны кыйдаспыт, кыайыыны ситиспит, олоҕу уһансыбыт Далбар хотуттар!
Эһиги сатаабатаххыт-кыайбатаххыт диэн суох. Үлэ буоллун, үөрүү буоллун, инники күөҥҥэ – Эһиги, ыал ийэлэрэ, кыргыттара, эбэлэрэ. Үөрэбит, астынабыт, киэн туттабыт!
Ыарахан күҥҥэ-дьылга быа курдук уһаан, тимэх курдук тэнийэн, күн курдук күндээрэн, сарыал курдук сандааран, күүстээхтик сананан, сүрэххит иэйиитинэн, илиигит сылааһынан тикпит таҥаскыт, астаабыт аскыт, ыраах Украина сиригэр дойдуларын — Россия судаарыстыбатын туһун көмүскүү сылдьар буойуттарбыт санааларын көтөҕөр, саалаахтан самныбат, охтоохтон охтубат модун кыахтыыр, кыайан-хотон, дьиэҕэ-уокка, дьоҥҥо-сэргэҕэ этэҥҥэ эргиллэн кэлэргэ эрэли үөскэтэр.
Иэримэ дьиэбит иэйиэхситтэрэ, алаһа дьиэбит айыыһыттара, Эһиэхэ олоххут бары эйгэтигэр ситиһиини, чэгиэн туругу, үтүмэн үөрүүнү, истиҥ тапталы, дьолу-соргуну баҕарабын!
Кэнчээри ыччаппыт кэхтибэт кэскилин, төлкөлөөх түөрэҕин олордуҥ! Саргы салалыннын, соргу тосхойдун! Дьоллоох буолуҥ!
Улууспут кэскиллээх, сайдыылаах олоҕун туһугар биир өйүнэн-санаанан салайтаран түмсүөххэ, биир сомоҕо буоламмыт саҥа кэрдиискэ бигэтик хардыылыахха! Түмсүү – ситиһии төрдө!
Ытыктабылы кытта
Үөһээ Бүлүү улууһун баһылыга Валерий Николаев