“Үөһээ Бүлүү улууһа” муниципальнай оройуон дьаһалтатын аатыттан уонна тус бэйэм Эһигини Саха Өрөспүүбүлүкэтин күнүнэн эҕэрдэлиибин!
Саха Автономнай Сэбиэскэй Социалистическай Өрөспүүбүлүкэтэ Россия састаабыгар 1922 сыл муус устар 27 күнүгэр тэриллибитэ, 1992 сыллаахха Саха Өрөспүүбүлүкэтин Конституцията (Төрүт Сокуона) ылыныллыбыта. Саха Автономията өрөспүүбүлүкэ быһыытынан статустаммыта хас биирдии Саха сирин олохтооҕун дьылҕатыгар сүҥкэн суолталаах. Уһулуччулаах судаарыстыбаннай уонна бэлитиичэскэй диэйэтэллэр: Исидор Барахов, Максим Аммосов, Платон Ойуунускай, Степан Аржаков, Степан Васильев — сырдык ааттара, сыралаах үлэлэрэ дьон өйүгэр-санаатыгар сүппэт гына иҥиэх тустаахтар.
Кинилэр Саха сирин судаарыстыбаннай тутулун иилээн-саҕалаан тэрийбиттэрэ, сирин-уотун тыырсыбыттара, экэниэмикэтин, бырамыысыланнаһын сайдыытын төрүттээбиттэрэ, барҕарыы суолларын ыйбыттара. Судаарыстыбаннас үөскээбитэ, сэбиэскэй тутул олохтоммута, социализм туругурбута. Онтон салгыы уларыта тутуу, ырыынак сыһыаннаһыылара, 2003 сылтан олохтоох бэйэни салайыныы сокуоннара олоххо киирэн, балысхан социальнай-экэнэмиичэскэй, култуурунай уонна духуобунай сайдыы бара турар.
Саха Өрөспүүбүлүкэтин сайдар саҕаҕа киэҥ, кэскилэ кэтит. Россия бөдөҥ федеральнай торумнарыгар киирсэн, норуот хаһаайыстыбатын сүрүн салаалара барыстаахтык үлэлиир кыахтаннылар. Дьон-сэргэ олоҕун таһыма үрдүүр. Элбэх оҕолоох, кыра дохуоттаах ыалларга судаарыстыба көмөтө сыллата үксүүр, күннэтэ күүһүрэр. Ил Дархаммыт Айсен Николаев үлэни, үлэ киһитин өрө тутар, өбүгэбит үгэһин, төрөөбүт төрүт тылбытын сайыннарыыга ураты болҕомтотун уурар.
Россияҕа дьиэ кэргэн, Саха сиригэр оҕо саас, Үөһээ Бүлүүгэ түмсүү сылларыгар аналлаах араас сэргэх тэрээһиннэр тэтимнээхтик бара тураллар.
Хаан-уруу дьоммут Украина сиригэр-уотугар буола турар анал байыаннай дьайыыга кыттан, нацизмы, фашизмы утары хорсуннук охсуһа сылдьаллар. Кинилэр саалаахтан самныбакка, охтоохтон охтубакка, кыайыы көтөллөөх иэримэ дьиэлэригэр этэҥҥэ эргиллэн кэлэллэрин туһугар биһиги үрдүк Айыылартан көрдөһөн, алгыспытын ыытабыт. Сэрии буолан баран сүтүктээх…Россия көҥүлүн, тутулуга суох буолуутун иһин эдэркээн олохторун толук уурбут уолаттарбыт сырдык кэриэстэригэр төбөбүтүн нөрүтэбит…
Ыам ыйыгар улуус дэлэгээссийэтэ Үөһээ Бүлүү буойуттарын сирэй көрсө, сүргэлэрин көтөҕө бараары бэлэмнэнэ сылдьар.
Барыгытыгар түмсүүлээх буолууну, или-эйэни, сарсыҥҥы күҥҥэ бигэ эрэли, дьолу-соргуну баҕарабын!
Туругурдун тапталлаах Сахабыт Өрөспүүбүлүкэтэ!
Туругурдун дьоһун дойду Үөһээ Бүлүү!
Үөһээ Бүлүү улууһун Баһылыга В. Николаев
