«Үөһээ Бүлүү улууһа» муниципальнай оройуон дьаһалтатын уонна тус бэйэм ааппыттан эһигини Учууталлар аан дойдутааҕы күннэринэн эҕэрдэлиибин!
Россияҕа Учуутал күнэ ССРС Үрдүкү Сэбиэтин президиумун Ыйааҕынан 1965 сылтан алтынньы ый бастакы өрөбүлүгэр бырааһынньык быһыытынан бэлиэтэнэр буолбута. 1994 сылтан Холбоґуктаах Нациялар Тэрилтэлэрэ аан дойду үрдүнэн норуоттар икки ардыларынааҕы бырааһынньык быһыытынан Учуутал күнүн алтынньы 5 күнүгэр бэлиэтииргэ быһаарбыта. Россия Бэрэсидьиэнэ Б.Н.Ельцин бэйэтин уурааҕынан эмиэ ити күнү бигэргэппитэ.
Алтынньы 5 күнүгэр ЮНЕСКО 1966 сыллаахха учуутал статуһун, быраабын уонна эбээһинэһин туһунан боппуруоһу көрбүтэ, «Учуутал балаһыанньатын туһунан» норуоттар икки ардыларынааҕы бастакы докумуону ылыммыта.
Оскуола — олох эргийэр киинэ, өйдөөҕү, үтүөнү, үйэлээҕи тарҕатааччы. Учуутал оҕоҕо билиини биэриинэн муҥурдаммат, кини бүтүн уопсастыбаҕа духуобунаһы, сиэрдээх быһыыны-майгыны иҥэрэр үрдүк аналлаах.
Бүгүн учуутал хас биирдии оҕо ис кыаҕын, дьулуурун уонна сатабылын арыйыахтаах, сайыннарыахтаах, билиитин хаачыстыбатын тупсарыахтаах.
Биhиги иннибитигэр чөл, чэгиэн-чэбдик, сайдам-сайаҕас, күүстээх-уохтаах, билиҥҥи үйэ саҥа инновационнай ньымаларын, аныгы технологиялары сатаан туhанар, аан дойду ааттаахтарын, атын омук чулууларын кытта тэҥҥэ алтыһар, бэйэтин санаатын хас да омук тылынан сайа этэр кыахтаах гражданины, исписэлииһи, ыал ийэтин-аҕатын, дойду патриотун иитэн-уһуйан таһаарыы соруга турар. Ол туһугар өрөспүүбүлүкэҕэ сыллата уончалыы, быйыл 14, саҥа оскуола үлэҕэ киирэр.
Биһиги улууска педагог уонна настаабынньык сылын чэрчитинэн алтынньы 2-7 күннэригэр Учуутал улахан нэдиэлэтэ үрдүк тэрээһиннээхтик ыытыллыа. Бу түҥ былыргы уонна саамай ытыктанар идэҕэ, учууталга уонна настаабынньыкка сүгүрүйүү бэлиэтэ буолуо. Биһиги, Үөһээ Бүлүүлэр, киэн туттабыт ССРС норуодунай учуутала М.А.Алексеев, Саха Өрөспүүбүлүкэтин норуодунай учуутала В.С.Долгунов, РФ норуодунай учуутала В.Ф.Потапов албан ааттарынан! Аҕа дойдуну көмүскүүр Улуу сэрии кыттыылааҕа, РСФСР уонна Саха АССР үтүөлээх учуутала, “Бочуот знага” уордьан кавалера, номоххо киирбит Исидор Бараахап аатынан орто оскуола дириэктэрэ Д.С.Спиридонов 100 сааһын улуус киэҥник бэлиэтиир.
Үөһээ Бүлүүбүт, Сахабыт Өрөспүүбүлүкэтин үөрэҕин тиһигин үтүө үгэстэрин туһанан, салгыы сайыннаран, саҥаттан саҥа үрдэллэри ылан, сырдыктан сырдык саҕахтары арыйан иһиҥ!
«Үөһээ Бүлүү улууһа» муниципальнай оройуон баһылыгын
эбээһинэһин быстах кэмҥэ толорооччу Семен Михалев