Үөһээ Бүлүү оройуона (улууһа) төрүттэммитэ 90 сылыгар, Үөһээ Бүлүү бибилэтиэкэлэригэр оҕо ааҕыытын сылынан уонна төрөөбүт тыл уонна сурук-бичик күнүн чэрчитинэн бүгүн, олунньу 14 күнүгэр, О. Д. Федорова аатынан киин бибилэтиэкэҕэ улуустааҕы II дорҕоонноохтук ааҕыы улуустааҕы күрэҕин түһүлгэтэ ыытылынна. Бу кэрэхсэбиллээх, тыҥааһыннаах күрэҕи О.Д. Федорова аатынан киин бибилэтиэкэ уонна улуустааҕы Ийэ тыл сүбэтэ иилээн-саҕалаан, тэрийэн ыыттылар.
Күрэххэ Кырыкый, Мэйик, Хоро, Нам, Ороһу, Балаҕаннаах нэһилиэктэрин уонна оройуон кииниттэн И. Барахов аатынан 1-кы, М.Т. Егоров аатынан 2-с, Ю. Н. Прокопьев аатынан 3-с спортивнай уонна Д. С. Спиридонов аатынан улуустааҕы гимназия алын, орто, үрдүкү сүһүөх оскуолаларын үөрэнээччилэрэ – барыта үстүү оҕолоох 11 хамаанда күөн көрүстэ.
Икки түһүмэҕинэн барбыт күрэххэ оҕолор талан ылбыт айымньыларын дорҕоонноохтук, мүнүүтэҕэ, хоһоону уус-ураннык ааҕан, дьүүллүүр сүбэ сыанабылыгар тиритэ-хорута үлэлээтилэр.
Кыттааччылар тылы сыыһата суох сөпкө ааҕыыларын, сурук бэлиэтин тутуһууларын, сөпкө тыыныыларын, дорҕоонноох саҥаларын, ааҕыыларын тэтимин, сөпкө туттан олорууларын, мүнүүтэҕэ хас тылы аахпыттарын, хоһоон уобараһын арыйыыларын, хоһоон тыынын истээччигэ тириэрдиилэрин, хоһоон тэтимин арыйарга көмөлөһөр туттууларын-хаптыыларын барытын Ийэ тыл сүбэтин салайааччыта Бурхалей Макаров бэрэссэдээтэллээх дьүүллүүр сүбэ чилиэннэрэ сыаналаатылар.
Бурхалей Степанович оҕолорго инникитин маннык күрэхтэргэ кытталларыгар элбэхтик кинигэни ааҕарга, дорҕоону, тылы сөпкө саҥара үөрэнэллэригэр, уус-уран, дорҕоонноох ааҕыы, туттуу-хаптыы култууратын үрдэтэллэригэр иһирэх сүбэлэрин анаата, оҕолор барахсаттар кыахтарын иһинэн олус кыһаллан, төһө да долгуйдаллар, оскуолаларын, нэһилиэктэрин чиэһин ситиһиилээхтик көмүскээбиттэринэн эҕэрдэлээтэ, махтал тылларын тириэртэ.
Биэс бастыҥ хамаанда – Хоро, Ороһу, Ю. Н. Прокопьев аатынан 3-с спортивнай, Мэйик, Балаҕаннаах оскуолаларын үөрэнээччилэрэ финалга тахсан, “Бастыҥ хамаанда” аатын ылар иһин салгыы күөн көрүстүлэр.
Долгутуулаах, сытыы киирсиилэр түмүктэринэн хас биирдии кыттааччыга туоһу уонна добун суруктары кытта минньигэс бэлэхтэр туттарылыннылар. Сүрүн түмүккэ 3-с үрдэли Г. Н. Чиряев аатынан Хоро орто оскуолата ылан сыаналаах кинигэлэринэн уонна остуол оонньуутунан, 2-с үрдэлгэ Ю. Н. Прокопьев аатынан 3-с спортивнай оскуола тахсан, Үөһээ Бүлүү нэһилиэгин баһылыга Максим Силигиянов туруорбут 2500 солк. суумалаах сертификатынан, кинигэлэринэн наҕараадаланнылар. Онтон бастакы үрдэл хаһаайыннарынан Мэйик сүрүн оскуолатын үөрэнээччилэрэ буолан, 5000 солк. суумалаах сертификаты уонна бэртээхэй кинигэ наборун бэлэх туттулар. Ороһу уонна Балаҕаннаах оскуолаларын хамаандалара биһирэбил бирииһинэн уонна кинигэлэринэн бэлиэтэннилэр.
Оҕолорбутугар инникитин да маннык уустук эрээри, сахалыы саҥа дуораһыйа турарыгар туһуламмыт бэртээхэй күөн күрэскэ кытта, төрөөбүт тылларын харахтарын харатын курдук харыстыы, хараанныы туралларыгар баҕарыаҕыҥ. Хайа да омук төрөөбүт тылын билэр, таптыыр, сыаналыыр кэнчээри ыччаттаах буоллаҕына, тыыннаах буолар, салгыы сайдар, барҕарар кыахтанар. Тыл – бүтүн норуот барҕа баайа, кэлэр кэскилэ.
Сахалыы сайаҕастык саҥарар, иэйиибитин истиҥник этинэр Ийэ тылбыт үйэлэргэ сүппэккэ үүнэ-сайда турдун!
Галина Васильева
«Үөһээ Бүлүү» хаһыат