Сылаас эйгэҕэ махтал киэһэтэ.Улуустарга, нэһилиэктэргэ Аҕам саастаахтар күннэринэн үгүс элбэх, араас хабааннаах тэрээһиннэр буолуталаатылар. Мэйик нэһилиэгэр 65 саастарыттан үөһээ саастаах дьоммутугар аналлаах махтал киэһэтэ тэрээһин буолан ааста. Дьоммут, саас кинилэргэ мэһэй буолбатын бигэргэтэн, эдэрдии эрчимнээхтик, көхтөөхтүк кэлэн, мааны ыалдьыт буоллулар. Куруук көхтөөх, тэрээһиҥҥэ үөрэ-көтө сылдьар, кэнсиэртэргэ кэлэн эрэллээх көрөөччү буолан ытыс тыаһын бэлэхтиир аҕам саастаах ытыктыыр дьоммут Борисова Раиса Афанасьевна,
Иванова Марфа Ивановна,Федотова Джемма Иннокентьевна,Иванова Галина Абрамовна,Федорова Юлия Викторовна,Павлова Василина Васильевна,Валентина, Валентин Поповтар,Маргарита, Николай Прокопьевтар,
Потапова Марианна Степановна тэрээһин сэргэх ыалдьыттарынан буоллулар.
Эһиги көххүт биһиэхэ убаастабыл уонна холобур буолар диэн туран, махтанан,эрэллээх, көхтөөх саастаах ыалдьыттарын кулууп үлэһиттэрэ Семен Васильев,Августина Иванова, Ольга Алексеева ылбаҕай ырыаларынан эҕэрдэлээн үөртүлэр.Куруук маннык көхтөөх, олоххо тардыһыылаах буолуҥ диэн баһылык Иван Игоревич Яковлев эҕэрдэтин тириэртэ.
Сэргэхсийиҥ, дуоһуйа сынньаныҥ диэн»Сайдыына», «Ситим» көхтөөх кыттааччылара, эбээлэрбит диэбэккэ, аныгылыы стиллээхуонна табыгастаахтык таҥнан, бары сөбүлээн истэр»Синий иней» диэн хит-ырыа музыкатыгар сөп түбэһиннэрэн,чэпчэкитик хамсанан, флешмоб үҥкүүлээн, сэҥээриини ыллылар. Ааспыкка үҥкүүлээбиттэринээҕэр өссө табыллан, «Ферма кыргыттара» үҥкүүлэринэн эҕэрдэлээтилэр.Үҥкүүлэр табыллан толоруллубуттарыгар эдэр, саҥа үлэһит, хореограф Ольга Владимировна тэҥҥэ үҥкүүлэспитэ үҥкүүһүттэригэр тирэх буолбута чуолкай.Онон саҥа саҕалаан эрэр үҥкүүһүт уонна эбээлэр ыалдьыттарга истиҥ иэйиини бэлэх ууннулар.
Саастаах дьоммут элбэх астаах остуол тула олорон ирэ-хоро сэһэргэһэн, уруккуну-хойуккуну ахтыһан, оонньууга көхтөөхтүк кыттан, таайбараҥҥа табатык эппиэттээн, дьоро күнү үйэтитэн, хаартыскаҕа түһэн, сылаастык дуоһуйа сынньанан тарҕаспыттарыттан киһи эрэ үөрэр.Күндү дьоммут мэлдьи доруобай уонна маннык көхтөөх буолуҥ.
Ыалдьыттары бырааһынньык кэнниттэн Николай Прокопьев уонна Александр Потапов массыынанан дьиэлэригэр
илдьэн биэрэри хааччыйбыта олус махталлаах.
Аграфена Баишева