Үөрэх дьыла түмүктэнэн оскуолалар аайы оҕо бырааһынньыктара, оҕо ыһыахтара ыытыллан эрэллэр. Биһиги оскуолаҕа директоры иитэр үлэҕэ солбуйааччы Миладора Григорьевна Мачахтырова салалтатынан тэрээһиммит үрдүк тэрээһиннээхтик ааста.
Төрөппүттэр, кылаас салайааччылара түмсэн истиҥ түһүлгэлэри тэрийбиттэр, баай сандалы тардыбыттар. Оҕолорбут кыргыттар да, уолаттар да сахалыы таҥастара ханнык да конкурстарга кыттыах курдук үчүгэй. Сүһүөхтэринэн спорт араас көрүҥэр куоталастылар, оонньоотулар, сүүрдүлэр — көттүлэр. Үөрэх бастыҥнара, спортивнай куоталаһыылар кыайыылаахтара грамоталарынан наҕараадаланнылар, бириис тутан үөрдүлэр. Үгэскэ кубулуйбут сылын аайы бастыҥ, ситиһиилээх үөрэнээччигэ туттарыллар Трофим Иустинович Петров аатынан стипендия 6-с кылаас үөрэнээччитигэр Артем Мачахтыровка, олохтоох модельнай библиотека библиотекаря Ирина Захарова «Бастыҥ ааҕааччы» номинацияны Златан Абраховка туттардылар.
Маннык үчүгэй оҕо бырааһынньыгын тэрийбит оскуола салалтатыгар, чуолаан директор эбээһинэһин толороочу Эльза Устиновна Васильеваҕа махтанабыт.
Лариса Николаева, учуутал
Өргүөт