От ыйын 9 күнүгэр, редакция дьиэтигэр аһаҕас аан күнэ буолан ааста, ол эбэтэр “Ааҕааччы күнэ”. Бу күн “Дьоллоох сурутуу” кыайыылаахтарын миэстэтигэр тута биллибит, үөрүүлээх түгэни бары тэҥҥэ үллэһиннибит!
Ол курдук, “Эгэлгэ” ювелирнай хампаанньа туруорбут анал бирииһин — үрүҥ көмүс ытарҕаны Үөһээ Бүлүү олохтооҕо, СӨ социальнай сулууспатын туйгуна Анна Дмитриевна Васильева тутан үөрдэ-көттө. Саха иһитин нобуорун эдэр ыал ийэтэ Надежда Степанова, убаастабыллаах бэтэрээммит, өр сылларга редакция-типография салайааччытынан үлэлээбит Ирина Петровна Абрахова бэйэтэ үүннэрбит дьиэтээҕи сибэккилэрин Раиса Егоровна Степанова уонна Максим Филиппович Силигиянов сүүйүүгэ тигистилэр. Типографиябыт бэтэрээнэ, ытыктыыр киһибит Роза Ивановна Данилова туруорбут хаартыска раамкаларын сурутааччыларбыт Зинаида Горохова уонна Михаил Абрахов ыллылар. Маны таһынан редакция үлэһиттэрэ бэйэлэрин күүстэринэн туруорбут бириистэрин сурутааччыларбыт тутан үөрүүлэрэ үгүс. Кыайыылахтарга эҕэрдэ! Бириистэри туруорбут дьоммутугар барҕа махтал!
Үрүҥ көмүс ытарҕа хаһаайката Анна Дмитриевна
Хаһыатта суруттарыҥ диэн бука барыгытын ыҥырабыт! Билигин да сурутуу бара турар, бу күннэргэ почта нөҥүө суруттардаххытына хаһыаты атырдьах ыйыттан тутар буолаҕыт. Почтаҕа сурутуу сыаната 719,50 солк. Онтон редакцияттан кэлэн ылыан баҕалаах сурутааччыларбытыгар сурутуу сыаната 667,50 солк. (эмиэ атырдьах ыйыттан).
«Үөһээ Бүлүү» хаһыат