Убаастабыллаах Үөһээ Бүлүү улууһун олохтоохторо, күндү үөрэнээччилэр, төрөппүттэр, ытыктабыллаах педагогическай үлэ бэтэрээннэрэ, учууталлар, иитээччилэр, Эһигини 2024-2025 үөрэх сыла саҕаланар Билии күнүнэн улуустааҕы үөрэх салалтатын, педагогическай общественноһын ааттарыттан эҕэрдэлиибин!
Улууспут үөрэҕин тэрилтэлэрэ билиҥҥи кэм ирдэбилинэн үөрэх дьылын толору бэлэм көрсөллөр. Өрөспүүбүлүкэ, улууспут үрдүкү салалталара биһиги үөрэнээччилэрбит, иитиллээччилэрбит уопсай үөрэхтээһин бырагырааматыгар толору билиини ылан, хаачыстыбалаах үөрэхтэн хаалбаттарын туһугар бары дьаһаллары ылаллар. Күн бүгүн улууска 3286 үөрэнээччи оскуола паартатыгар олоруоҕа, 1 кылааска 305 оҕо оскуола боруогун аан бастаан атыллыа, 9-с кылааска — 312, 11-с кылааска – 260 үөрэнээччи Билии күнүн үөрүүлээхтик көрсүөҕэ. Үөрэнээччилэри 658 учуутал, 194 иитээччи, 80 эбии үөрэхтээһин педагогтара көрсүөхтэрэ.
Кэлбит үөрэх сыла иитии уонна үөрэх хаачыстыбатыгар ураты болҕомтону ууруоҕа. Ол туһунан балаҕан ыйынааҕы учууталлар сүбэ мунньахтарыгар сүбэлэһиэхпит. Атырдьах ыйынааҕы өрөспүүбүлүкэ үөрэҕин үлэһиттэрин сүбэ мунньаҕар Ил Дархан Айсен Сергеевич Николаев уонна СӨ үөрэххэ уонна наукаҕа миниистирэ Нюргуна Афанасьевна Соколова үөрэх үлэһиттэригэр туһаайбыт этиилэрэ болҕомто киинигэр ылылынна.
Ытыктабыллаах педагогическай үлэ бэтэрээннэрэ, учууталлар, иитээччилэр, төрөппүттэр, үөрэнээччилэр, үөрэх салаатын бары үлэһиттэрэ! Эһиэхэ чөл доруобуйаны, дьиэ кэргэттэргитигэр туруктаах олоҕу, инникигэ эрэллээх буолууну, саҥа үөрэх сыла барыгытыгар уһулуччу ситиһиилээх буоллун! Саргыны түстүүр, сайдыыга саҥа суоллары арыйар уустук уонна олус эппиэттээх бэлиэ кэмҥэ, бары биир киһи курдук, улууспут кэнэҕэски кэнчээри ыччата үөрэххэ, билиигэ муҥутуур интэриэстээх, олох киэҥ аартыгар толору бэлэмнээх, бэйэтигэр эрэллээх буоларыгар бары биир санаанан салайтаран, оҕолорбутугар дьоһуннаах олоҕу түстүөҕүҥ.
Улуустааҕы үөрэх салалтатын начальнига,
Юрий Кынатов
