Сургуулуктааҕы модельнай бибилэтиэкэ көҕүлээһининэн сэбиэдиссэй Лидия Никифорова, саха бастакы фантаст-суруйааччыта, биология наукатын дуоктара, профессор, РФ Суруналыыстарын Сойууһун чилиэнэ, саха литературатыгар научнай фантастика жанрын киллэрбит фантаст суруйааччы, Аан дойдуга маҥнайгынан олоххо-дьаһахха туттарга анаммыт биологическай термометр ааптара, Аан дойду Дед Моруостарын кэккэтигэр киирбит Эһээ Дьыл, РФ аналлаах үрдүк үөрэҕин уонна М.К. Аммосов аатынан ХИФУ Бочуоттаах бэтэрээнэ, СӨ култууратын үтүөлээх үлэһитэ Гаврил Спиридонович Угаров-Угаалаах 85 сааһыгар анаммыт тэрээһин чэрчитинэн, фантастическай кэпсээни суруйууга Үөһээ Бүлүү улууһун оскуолаларын үөрэнээччилэрин ортолоругар (V-XI кылаастар) кэтэхтэн куонкуруһу ыытта.
Бастакы бөлөххө, 5-8 кылаас оҕолоругар, 1-кы миэстэни бырааттыы Боескоровтар ааттарынан орто оскуола 8-с кылааһын үөрэнээччитэ Дайаана Анисимова, 2-с миэстэни 8-с кылаас үөрэнээччитэ Тимур Ксенофонтов, 3-с миэстэни Кристина Сергеева ыллылар. Иккис бөлөххө 1-кы миэстэ Тааттаттан Сайаана Сидорова, 2-с миэстэ Харбалаахтан Ильдар Николаев, 3-с миэстэ Дүллүкүттэн Сааскыйа Васильева буоллулар. Сургуулуктааҕы модельнай бибилэтиэкэ туруорбут анал бирииһэ Кэнтик орто оскуолатын 11 -с кылааһын үөрэнээччитигэр Василина Ивановаҕа ананна (сал. Семенова Н.А). Лидия Федоровна кыайыылаахтарга Угаров 75 сааһыгар хомуйан оҥорбут «Тымныы мин олоҕум уонна айар үлэм суолдьут сулуһа » диэн кинигэтин туттарда.
Бастыҥ айымньылар бу куонкурус түмүгүнэн таҥыллыбыт хомуурунньукка киириэхтэрэ.
Валентина ФИЛИППОВА, Р.П. Матвеева аатынан Үөдүгэй нэһилиэгин бибилэтиэкэтин сэбиэдиссэйэ