Хантыраагынан сулууспа туһунан СӨ оперативнай ыстаабын быһаарыыларын толорууну хонтуруоллуур тэрээһиннэр чэрчилэринэн Үөһээ Бүлүү улууһугар СӨ федеральнай инспектордара Евгений Корнеев уонна Николай Романов кэллилэр.
Улуус дьаһалтатын аактабай саалатыгар тэрилтэлэр салайааччылара, нэһилиэктэр баһылыктара, Бүлүү, Үөһээ Бүлүү оройуоннарын байыаннай хамыһаара, сүүмэрдиир пуун инструктора, кыттыылаах сүбэ-мунньахха хантыраагынан сулууспаҕа дьону угуйуу үлэтэ күүскэ ыытыллыахтааҕын туһунан кытаанахтык этилиннэ.
Хантыраагы баттааһын агитацията төһө күүскэ барарын, онуоха анаан хайдах быһыылаах үлэ тэриллэрин кэпсэттилэр. Улуустарынан хонтуруоллуур сыаллаах үлэ түмүктэрин РФ Бырабыыталыстыбатын бэрэссэдээтэлин солбуйааччы, Уһук Илиҥҥи федеральнай уокурукка Президент боломуочуйалааҕа Юрий Трутневка быһаччы дакылааттанарын туһунан Евгений Корнеев тоһоҕолоон бэлиэтээтэ.
