Билигин Сахабыт сиригэр бэнсиин атыыланар кээмэйэ хааччахтанар буолла. Бэнсиини, бүгүҥҥү туругунан, туспа таһыллар канистрга, таараҕа куттар бобулунна. Саха Өрөспүүбүлүкэтин бырабыыталыстыбатын быһаарыытынан, бу тэрээһин искусственнай дефицити үөскэппэт туһугар диэн сыаллаах оҥоһуллар.
Бэнсиин – күннээҕи олохпутугар улахан суолталаах ресурстарбытыттан биирдэстэрэ. Онон сибээстээн бэнсиини хааччахтааһын, сыана үрдээһинэ дьон сүрэҕэр-быарыгар саарбаҕалааһыннары уонна ыйытыылары үөскэтэрэ биллэр суол.
Бу балаһыанньа төһө өр турара буолуой – билигин ким да чопчу эппиэт биэрэр кыаҕа суох. Үөһээ Бүлүүгэ “Саханефтегазсбыт” заправкатыгар тимир көлөлөөх дьон уруккутун курдук кэлэ-бара бэнсиин куттар, аймалҕан суох. Дьон-сэргэ бу ыарахаттары аһардарга, саҥа усулуобуйаларга үөрэнэн иһэргэ дьулуһар. Бу кыһалҕа уҕарыйыа, олохпут чэпчиэ диэн эрэнэн, инникигэ эрэллээхтик хардыылыы туруох!
«Үөһээ Бүлүү» хаһыат