Кэрэ айылҕалаах, күүс-уох, дьулуур тыына иҥмит Кэбээйи сиригэр ыытыллыбыт XIX Өрөспүүбүлүкэтээҕи Олоҥхо Ыһыаҕар Үөһээ Бүлүүтээҕи библиотечнай ситим үлэһиттэрэ көхтөөх кыттыыны ыллылар.
Ол курдук, Олоҥхо түһүлгэтигэр олоҥхоһут, оһуохайдьыт, алгысчыт, бөлүһүөк, тойуксут Андрей Титович Титаров үбүлүөйдээх 110 сылыгар аналлаах улахан быыстапка туруордулар. Маны тэҥэ быйыл V төгүлүн ыытыллар «Олоҥхо уһун тыыннаах ааҕыытын» биир идэлээхтэрин кытары ыыттылар. Бу бырайыак ааптара Саха Өрөспүүбүлүкэтин култууратын туйгуна, Үөдүгэй нэһилиэгин бочуоттаах олохтооҕо Наталия Кирилловна Петрова буолар. Кини көҕүлээһининэн 2022 сылтан Үөһээ Бүлүүгэ ыытыллыбыт Олоҥхо ыһыаҕыттан саҕалаан аан бастакытын ыытыллыбыта. Ол иннинэ бу бырайыак улуус таһымнаах үгэс буолан ыытыллар этэ. Онтон 2023 сылга Өймөкөөн улууһугар, 2024 сылга Аммаҕа, 2025 сылга Нерюнгрига ыытыллыбыта. Онтон эһиил Ленскэйгэ буолуо.
Бу туһунан О.Д.Федорова аатынан киин библиотека библиотекара Мария Адамова ирэ-хоро кэпсээтэ:
Быйылгы ааҕыыга уопсайа 101 киһи П.А. Ойуунускай «Дьулуруйар Ньургун Боотур» олоҥхону сахалыы, нууччалыы, эбээннии аахтылар. Бу иһигэр биһиги библиотека үлэһиттэрэ эмиэ аахтыбыт. Хас биирдии ааҕааччыны тутатына хаартыскаҕа түһэрэн стендэҕэ ыйыыллар.
Дьон кыттыыта көхтөөх, олоҥхоҕо интэриэстэрэ баарыттан үөрэбит. Маннык бырайыактар норуот биир сомоҕо буоларыгар, кини духуобунай күүһүн бөҕөргөтөргө, төрүт тылы, култуураны харыстыырга улахан оруолу оонньууллар.
Биһигини уонна Өймөкөөн, Усуйаана делегациятын 2-с Лүүчүн нэһилиэгэ көрсөн икки күн устата наһаа минньигэстик аһаппыттара.
Биһиги тэрилтэ аатыттан биир идэлээхтэрбитигэр, библиотека үлэһиттэригэр уонна ураты ытыктабылы тиэрдэбит минньигэс астаах, үтүө сүрэхтээх повардарбытыгар махталбытын ыытабыт.
Эһиги сылаас илиигитинэн бэлэмнээбит, ырыа-хоһоон тыллаах, алгыс тыыннаах аскыт биһиэхэ күүс-уох биэрдэ. Устар уулуу уһун олохтоох буолуҥ, үтүмэн үгүс үөрүүлээх-көтүүлээх буолуҥ!
Дьүрү, айылҕалыын ыалдьытымсахтар эбиит. Оруобуна ыһыах буолар күннэригэр киһини сөрүүкэтэр наһаа үчүгэй тыаллаах этэ. Халлаан ып-ыраас, күн чаҕылыччы тыгар. Ол эрэн бу тыал баар буолан налыччы, холкутук сырыттыбыт.
Тус бэйэм хаһааҥҥытааҕар даҕаны күүстээх алгыс тылларын ылан олус астынным, дуоһуйдум.
Мария Васильева,
“Үөһээ Бүлүү” хаһыат
