Олохтоох салайыныы уорганнарын дааннайынан, өрөспүүбүлүкэҕэ санитарнай ыраастааһын үс ыйдаах хампаанньатын түмүгэ таҕыста диэн СӨ Экологияҕа, айылҕаны туһаныыга уонна ойуур харыстабылыгар министиэристибэ иһитиннэрэр.
Быйыл кыттааччылар уопсай ахсааннара аччаабытын да үрдүнэн, экологическай көх улаатар, ыытыллар тэрээһиннэр көдьүүстэрэ үрдээтэ.
Отчуоттуур кэм устата 1903 субуотунньук тэриллибит, бу былырыыҥҥы туһааннаах кэмтэн 16,3% элбэх (1 637 тэрээһин).
Статистиканы ырытыы интэриэһинэй динамиканы көрдөрдө: аахсыйалар ахсааннара эбиллэрин үрдүнэн, кыттааччылар уопсай ахсааннара кыччаата. Быйыл ырааһырдыыга 36606 киһи кытынна, бу былырыыҥҥыттан 7,5% аҕыйах (39562 киһи). Ордук эдэр дьон кыттыыта биллэрдик түспүт: былырыын 18-тан 35-гэр диэри саастаахтарга 20757 киһи тахсыбыт буоллаҕына, быйыл – 14138 (түһүү 31,5%).
Ол да буоллар, бу ситиһиилээх түмүктээх буолла. Сүрүн ситиһиинэн хомуллубут бөх-сах кээмэйэ буолла. Үс ый устата 58561,59 м³ олох-дьаһах тобоҕо хомуллан утилизацияланна. Бу былырыыҥҥы көрдөрүүттэн 64,2% элбэх (35658,33 м³).
«Биһиги көдьүүстээх үлэ үтүө түмүгүн көрөбүт, ол олохтоох салайыныы уорганнарын үлэлэрэ көдьүүстээх буолан иһэрин туоһулуур, – диэн балаһыанньаны быһаарар өрөспүүбүлүкэҕэ санитарнай ыраастааһыны тэрийээччи Михаил Андреев. – Кыттааччы ахсаана аҕыйаабытын да иһин, элбэх бөх хомуллар, кыһалҕалаах сирдэр тиһиктээхтик ыраастаналлар».
Хас биирдии маннык тэрээһин көдьүүһэ үрдүүр. Бу ситиһиини чиҥэтэн уонна сайыннаран иһэр туһугар, ыччаты субуотунньуктарга кыттыыга тардар иһитиннэрэр үлэни күүһүрдүөххэ, ону тэҥэ бөҕү таһыыны тупсарыахха наада.
Саха сирин Экологияҕа министиэристибэтэ эһигини сыста сытар сирдэри санитарнай ыраастааһыҥҥа, бөҕү-сыыһы кэмигэр таһаарыыга уонна ыраас буолууну тутуһарга салгыы үлэлэһэргитигэр ыҥырар. Биир сомоҕо буолан үлэлээтэхпитинэ, олорорго табыгастаах уонна куттала суох усулуобуйаны хааччыйыахпыт.
Сайаана Львова