2026 сыл Өлүөнэ муостатын тутааччыларга улахан суолталаах кирбиинэн буолуоҕа – Өлүөнэ өрүс сүнньүгэр тирэхтэри тутуохтара. Соторутааҕыта исписэлиистэр бастакы сүүнэ улахан коффердамы кытылга чугаһатар үлэни оҥордулар. Салгыы акылааты оҥорууга киириэхтэрэ –102 атаҕы түһэриэхтэрэ. 9 № – дээх тирэххэ иккис коффердамы хомуйуу салҕанан барыаҕа, номнуо 75% бэлэм. Быйыл сайын бырайыактаммыт балаһыанньатынан туруорарга бэлэм буолуоҕа диэн иһитиннэрэр Өлүөнэ муостатын тутуутун дириэксийэтэ. 17 миэтэрэ үрдүктээх үс маннык конструкция пилоннар акылааттарын оҥорорго кураанах сири бэлэмниир кыаҕы биэриэҕэ. Арассыыйа муостатын тутуутун историятыгар устар коффердамнар манна аан бастаан туттуллаллар.
Маны сэргэ кытылларга үлэ бара турар. Хаҥас уонна уҥа кытылларга эстакада үс тирэҕин тутуохтара. Уҥа кытылга 13 тирэххэ буронабивнай сыбаайалары тутууну салҕыахтара. Анал тиэхиньикэ сылдьарыгар анаан понтоннай муостаны туруоруохтара. Уҥа кытылга – суол буорун кутууну салҕыахтара. Бу сүҥкэн үлэни оҥорор дьоҥҥо үс саҥа уопсай дьиэни тутуохтара. Тэтимэ үрдээн, тутуу былаһааккатыгар 1,5 тыһыынчаҕа тиийэ исписэлиис үлэлиэҕэ. Быйыл Өлүөнэни туоруур муоста бастакы олоҕун булуо. Аан дойдуга тэҥэ суох бырайыак бэйэтин сүрүн сыалыгар – кытылы ситимнииргэ уонна Саха сиригэр тырааныспар тиийимтиэ буолуутун үрдэтэргэ эрэллээхтик хардыылыыр.
Хаартыска Өлүөнэ муостатын тутуу дириэксийэтиттэн