2025 сыл тохсунньу 1 күнүттэн анал байыаннай дьайыыга кыттыыны ылбыт байыаннай дьайыы бэтэрээннэрэ Росси» Соуциальнай пуондатын чөлгө түһэрии кииннэригэр санаторий-курорт хабааннаах эмтэниини ааһар буолуохтара. Бу туһунан Бырабыыталыстыба Бэрэссэдээтэлин солбуйааччы Георгий Степанов иһитиннэрдэ.
«Эмтэниини ааһар миэстэҕэ диэри барыы-кэлии ороскуотун Россия Социальнай пуондатын бюджетыттан уйунуохтара. Бу өҥөнү туһанар туһугар эмтэниини ааһыахтаах бэтэрээннэр олорор сирдэригэр Социальнай пуонда тэрилтэтигэр сайабылыанналарын биэрэхтээхтэр», – диэтэ Георгий Степанов.
Кини бэлиэтээбитинэн, Саха сиригэр байыаннай сулууспалаахтарга — байыаннай дьайыы кыттыылаахтарыгар уонна кинилэр дьиэ кэргэттэригэр аадырыстаммыт көмөнү оҥоруу тиһигин быспакка ыытылла турар. Ахсынньы 13 күнүнээҕи туругунан, 163 дьиэ кэргэҥҥэ олорор дьиэни газтааһыҥҥа материальнай көмө, 537 байыас төрөппүттэригэр санаторнай-курортнай эмтэниигэ көмө, 391 киһиэхэ байыаннай сулууспалаахтар эмтэниини ааһар миэстэлэригэр диэри айанныылларыгар материальнай көмө оҥоһуллубут. Ону тэҥэ 925 анал байыаннай дьайыы кыттыылааҕа уонна 1738 кинилэр дьиэ кэргэттэрин чилиэттэрэ доуобуйа харыстабылын уонна социальнай көмөнөн хааччыйар тэрилтэлэригэр эмтэниини, чөлгө түһэриини ааспыттар. 345 киһи дьиэтиттэн олорон эрэн социальнай өйөбүлүнэн туһаммыт. Нэһилиэнньэ дьарыктаах буолуутун кииннэригэр үлэ буларга көмөҕө наадыйарын 638 киһи биллэрбит, ол иһигэр 217 анал байыаннай дьайыы кыттыылааҕа уонна 421 кинилэр дьиэ кэргэттэрин чилиэттэрэ. Мантан 154 киһи профессиональнай үөрэхтээһиҥҥэ анаммыт, 388 киһи үлэ булбут.