Улуустааҕы дьахталлар Сэбиэттэрин Далбар Хотуттара, тохсунньу 6 күнүгэр, барыта холбоон 280 бэрэскини, ол иһигэр «Сандалы» диэн национальнай бүлүүдэни, 5 дьааһык алаадьыны астаан, барытын тоҥордулар. Сотору кэминэн бу кэһиилэрин госпиталларга эмтэнэ сытар уонна байыаннай дьайыыга Ийэ дойдуларын көмүскэлигэр сылдьар уолаттарбытыгар ыытыахтара.
«Дьахталлар түмсүүлэрин кэрэ аҥардара бу аспытын астыырга бородууктабытын барытын бэйэбит үппүтүнэн кыттыһан ылабыт. Өссө даҕаны маннык илиибит сылааһын ууран туран астаан, ыыта, көмөлөһө турар санаалаахпыт. Инникитин кэккэбит хаҥыы, элбии турарыгар буоллар. Онон дьахтар-аймах биһиэхэ кыттыһыҥ, күүс-көмө, сүбэ-ама буолуҥ диэн этиилээхпит. Маны таһынан «Дойдум тыына» диэн уолаттарбытыгар анаан иистэнэр сыахха кыттыһар санаалаахпыт. Олоҥхо дьиэтигэр бу хайысханан эмиэ итинник хабааннаах үлэни ыытыахпыт», — диэн санаатын үллэһиннэ дьахталлар Сэбиэттэрин чилиэнэ, норуот айымньытын киинин салайааччыта Изабелла Саввинова.
«Үөһээ Бүлүү» хаһыат