Бу сыллар тухары эн-мин дэһиспит, үтүө дьоммун, доҕотторбун, үөлээннээхтэрбин, аймахтарбын, үөрэппит оҕолорбун, биир дойдулаахтарбын, эһигини барыгытын кэлэн иһэр саргылаах Саҥа Дьылынан эҕэрдэлиибин!
Үүнэр саҥа сыл бука барыбытыгар чэгиэн-чэбдик доруобуйаны, үтүө түмүктээх үлэни, кэскиллээх саҕалааһыннары, үүнүүлээх түбүктэри, бастыҥ баҕа санаалары, далан барҕарыыны (могучее развитие), уостубат уйгуну, быстыбат быйаҥы уонна дьолу-соргуну аҕаллын! Үүнэр 2026 сылга үөрүү үктэллээх үктэниҥ! Санааҕыт хоту олоххут табыллан истин! Үп-харчы үгүөрүтүк кэллин! Доруобуйаҕыт, уйулҕаҕыт туруга тубустар тупса турдун! Чугас дьоҥҥут үөрүүтүнэн дьолгутун өссө толорон иһиҥ! Дьиэ-кэргэҥҥит ситиһиилэринэн, силиккит ситэн истин! Күн-түүн тупсуу, киэркэйии үксүү турдун! Хас биирдии дьиэҕэ чөл олох, таптал, дьоллоох оҕо саас олохсуйдун!
Запорожскай уобаластан «Давыч«
Россияҕа аҕа дойдуну көмүскээччилэр, Сахабыт сиригэр Ийэ дойдуну көмүскээччилэр, оттон Үөһээ Бүлүүбүтүгэр Дойдуга бэриниилээх буолуу сыллара ааһан эрэринэн, саҥа сылы көрсө тахсар нүөмэрбитигэр улууспут олохтоохторугар анаан, анал байыаннай дьайыыга сулууспалыы сылдьар уолаттарбытыгар быһа сибээскэ тахсан харда тыл ылбыппытын таһаарабыт.
Ахтар-саныыр, таптыыр Үөһээ Бүлүүм олохтоохторун, убаастабыллаах улууспут баһылыгын Валерий Валерьевич Николаевы уонна улуус дьаһалтатын үлэһиттэрин, Ольга Петровнаны, күндүттэн күндү ийэбин, бииргэ төрөөбүттэрбин, аймах-билэ, чугас дьоммун-сэргэбин кэлэн иһэр күүтүүлээх Саҥа сылынан ис сүрэхпиттэн истиҥник эҕэрдэлиибин!
Эһиги үтүө санааҕыт, илиигит сылааһынан бэлэмнээн, тигэн, бэрийэн ыыппыт көмөҕүт биһиэхэ күүһү-күдэҕи эбэр, дойдубут тыынын ылан, инникигэ эрэлбит күүһүрэр. Куруук маннык сомоҕолоһуоҕуҥ, түмсүүлээх буолуоҕуҥ, бэйэ-бэйэҕэ көмөлөһө, үтүө сыһыаны олохтуу сылдьыаҕыҥ. Кэлэр сыл өссө ситиһиилээх буоларыгар, дойдубут чэчирии сайдарын туһугар күүспүтүн түмүөхпүт, дьулуһуохпут, кыайыахпыт! Ис сүрэхпиттэн чэгиэн туругу, ситиһиини, дьолу, сырдык санааны, инникигэ эрэли, сайдыыны уонна эйэлээх олоҕу баҕарабын! Бу үтүө бырааһынньык алыптаах тыына уонна алаһа дьиэ сылааһа олохпутун үтүө түгэннэринэн толордун! Саҥа дьылынан, саҥа дьолунан, ытык-мааны ахтылҕаннаах Үөһээ Бүлүүм олохтоохторо!
Убаастабылы кытта БоБ, 394 полк
Күндү биир дойдулаахтарбын кэлэн иһэр Саҥа Дьылынан итиитик-истиҥник эҕэрдэлиибин! Кэлэр сыл эһиэхэ кытаанах Доруобуйаны, дьоллоох олоҕу, үрдүк дьайыылары, ситиһиини, кэрэни, эйэни эрэ аҕаллын.
Убаастабыллаах Валерий Валерьевич уонна Үөһээ Бүлүү олохтоохторо, эһиги анал байыаннай дьайыыга сылдьар уолаттарга улахан көмөҕүт, өйөбүлгүт иһин сүгүрүйэн туран ис сүрэхпиттэн махтанабын!!! Биһиги ыраах сылдьан, эһиги ыыппыт баһыылкаларгытын, суруктаргытын тутан, дьиэбит ахтылҕанын, кыратык да буоллар, таһаарынабыт. Мин, Семенов Василий Егорович, позывнойум «Тайфун» Запорожье хайысхатынан 64-с биригээдэ разведкатыгар сылдьабын. Үөһээ Бүлүү Намыгар оҕо сааһым ааспыта, Хоро орто оскуолатын бүтэрбитим. Эрэнэбит, кыайыы өрөгөйдөөх кэлиэхпит!
Ытыктабыллаах улууспут баһылыга Валерий Валерьевич уонна олохтоохторо! Эһигини кэлэн иһэр саргылаах Саҥа сылынан итиитик-истиҥник эҕэрдэлиибин!
Анал байыаннай дьайыы саҕаланыаҕыттан дойдубутун көмүскүү сылдьар уолаттарбытыгар көмөҕүт иһин олус махтанабыт! Эһиги сылаас илиигитинэн, истиҥ сүрэххитинэн оҥорбут кэһиилэргитин тутан дойдубут ахтылҕана тахсар. Улууспут олохтоохторун көмөлөрүттэн биһиги олус астынабыт, киэн туттабыт, санаабытыгар санаа, күүспүтүгэр күүс эбиллэр. Күндү дьоммутугар-сэргэбитигэр бу кэлэр сыл дьиэ кэргэҥҥитигэр дьолу-соргуну эрэ аҕаллын! Уонна түгэнинэн туһанан, Тамалакааным дьонугар-сэргэтигэр уонна баһылыкпар улууспут хаһыатын нөҥүө эмиэ барҕа махталбын тиэрдэбин.
Запорожьеттан Тамалакаан уола, «ПУГА» позывнойдаах Жека Тоскин