Марианна Евдокимова бэйэтэ идэтинэн инженер-энергетик, билигин сынньалаҥҥа олорон бэйэ хаһаайыстыбатын сайыннарар. Кини дьиэтин тиэргэнигэр улахан хаһаайыстыбалаах: куурусса, кус, индейкэ уонна хонуу курупааскытын иитиитинэн дьарыктанар.
Көтөр сымыыттарын ускуустубаннайдык инкубаторга ууран, көрөн-харайан, көтөр оҕолоро сымыыттан тахсалларын кэтиир. Күн бүгүн, хаһаайка тиэргэнигэр араас көтөрү ииттэн бэйэ хаһаайыстыбатын тэриммитэ номнуо 3 сыл буолбут.
Бу маннык дьарык туһунан кини аан маҥнай ыаллыы олорор дьүөгэтиттэн истибит, эрээри бастаан улаханнык сэҥээрбэтэх. Кэлиҥҥи кэмнэргэ, маҕаһыынтан атыылаһан ылыллар эт хаачыстыбатын туһунан ырыҥалаан толкуйдаан көрөн баран, дьиэҕэ иитиллибит көтөр этэ быдан туһалаах уонна минньигэс буолар диэн түмүк оҥостобут. Билигин кини дьиэ кэргэнэ олохтоох ынах этиттэн уратыны, атын эти маҕаһыынтан хаһан да атыыласпат.
Марианна Евдокимова индейкэ этиттэн олус элбэх бүлүүдэни астыыр. Ол курдук, бу көтөр этиттэн олус минньигэс кэтилиэт, пельмен, шашлык, миин о.д.а амтаннаах ас дэлэйэ астаныан сөп. Иитии көтөр этин амтана сибиинньэ уонна сылгы этин санатар диэн бэлиэтииллэр.
Марианна Евдокимова индейкэ икки көрүҥ боруодатын иитэ сылдьар. Бронза диэн боруодалаах 3 индейкэ баар, оттон бу маннык боруодалаах индейкэ ыйааһына 10 кг тиийэ улаатыан сөп. Хайбрид конвектор диэн боруода 25 кг тиийэ улаатар эбит. Ону таһынан тиэргэнин иһэ кус, куурусса уонна хонуу курупааскытын араас саҥатынан туолар.
Хаартыскалар ЯСИА саайтыттан
«Үөһээ Бүлүү» хаһыат.