Тохсунньу 20-22 күннэригэр Н.К.Седалищев — Дьүөгэ Ааныстыырап аатынан орто оскуола «Акция участникам СВО» тэрээһиҥҥэ кыттыһан оскуола коллектива уонна 1-11 кылааска диэри үөрэнээччилэр минньигэс муһан туттардыбыт. Ону таһынан минньигэс астаах асчыттарбыт сылаас илиилэринэн харта буһардылар, собо ыһаарылаатылар. Кырачаан оҕолорбут үтүө тыллаах сурук суруйдулар.
Хас биирдии нэһилиэк олохтооҕо сүрэҕин баҕатынан, илиитин сылааһынан ас астаан, үтүө дьыалаҕа кыттыһан кыайыыга сэмэй кылааты киллэрэр. Мантан туора турбакка биир киһи курдук көмө-тирэх буолуоххайыҥ. Уолаттарбыт төрөөбүт дойдуларын аһын-үөлүн тутан, амсайан төһө эрэ үөрүөхтэрэ, күүстэригэр күүс эбиллиэ.
Биир дойдулаахтарбытыгар, Сахабыт сирин хорсун буойуттарыгар тулууру, кыайыыга дьулууру баҕарабыт! Кыайыы кынаттаах төрөөбүт дойдугутугар эргиллэн кэлиҥ диэн алҕыыбыт!
«Үөһээ Бүлүү» хаһыат