Үөһээ Бүлүү, Амма, Нам, Кэбээйи, Мэҥэ-Хаҥалас улуустарыттан 200-тэн тахса ыччат Максим Аммосов аатынан кубок иһин өрөспүүбүлүкэтээҕи культурнай-спортивнай слекка кытыннылар.
Саха Өрөспүүбүлүкэтин төрүттээччилэртэн биирдэстэрэ — Максим Кирович Аммосов төрөөбүт-үөскээбит Намын улууһун Хатырык нэһилиэгэр киэҥ далааһыннаах тэрээһин буолан ааста. Слету арыйыы түгэнэ Өрөспүүбүлүкэ скверигэр судаарыстыбаннай уонна политическай диэйэтэл Максим Аммосов пааматынньыгар сибэкки дьөрбөтүн уурууттан саҕаланна.
Слет бастакы күнүгэр хамаандалар бэйэлэрин билиһиннэрдилэр уонна «Слава Отчизне, Россия моя!» тиэмэҕэ патриотическай ис хоһоонноох ырыа күрэҕэр кытыннылар. Тэрээһин чэрчитинэн Росмолодежь граннарыгар үөрэхтээһин, спортивнай күрэхтэһиилэр, «Диалог на равных» былаһааккаҕа кэпсэтиилэр, өрөспүүбүлүкэ биллэр-көстөр артыыстара кыттыылаах RAVE концерт буолла.
Туризмы сайыннарыы, ыччакка көхтөөх сынньалаҥы тэрийии, араас талааннаах ыччаты дьон көрүүтүгэр таһаарыы, чөл олоҕу тутуһуу, ыччат кыаҕын арыйыы — тэрээһин сүрүн сыалынан буолла. Санатар буоллахха, маннык өрөспүүбүлүкэ таһымнаах ыччат бэстибээллэрэ өрөспүүбүлүкэни төрүттээбит дьоммут: Исидора Барахов дойдутугар, биһиги улууспутугар, Үөһээ Бүлүүгэ, Степан Васильев дойдутугар Ньурба улууһугар, Степан Аржаковка аналлаах тэрээһин Бүлүү куоратыгар буолан ааспыттара.
Ил Дархан уонна СӨ Бырабыыталыстыбатын пресс-сулууспатын матырыйаалыттан.
