Бэс ыйын 7 уонна 8 күннэригэр выпускниктар талбыт предметтэрин тылынан эппиэттиир чааһын туттараллар.
Бу үрдүк үөрэххэ туттарсарга сүрүн миэстни ылар предметтэр буолаллар. Үөрэх министиэристибэтин кэтээн көрөн тэҥниир киинэ иһитиннэрбитинэн, информатиканы туттарыан баҕалаах 1210 выпускник бэлиэтэммит, омук тылын туттарыыга 677 оҕо сайабылыанньа биэрбит.
Эксээмэни туттарар 171 пууҥҥа уопсайа 280 кэтээн көрөөччү үлэлиир, ол иһигэр 22 федеральнай таһымнаах уопсастыбаннай кэтээн көрөөччү. Ону тэҥэ Үөрэх министиэристибэтин кэтээн көрөн тэҥниир киинин уонна Үөрэхтээһини сайыннарар уонна таһымы үрдэтэр институт базаларыгар икки ситуационнай, көрдөрөр-иһитиннэрэр киин үлэтин салгыыр.
Информатика эксээмэнэ кылгас эппиэттэрдээх 27 сорудахтаах, эппиэттэр тута бырагыраамаҕа бэрэбиэркэлэнэн иһэллэр. Выпускниктар 3 чаас 55 мүнүүтэ үлэлииллэр. Компьютерга тиэкис редакторые, электроннай таблица редакторын уонна бырагырааманы оҥрор систиэмэнэн туһаналлара көҥүллэнэр. Ол эрэн куйаар ситимигэр быһа холбоммоттор. Үлэлэрэ муҥутаан 100 баалынан сыаналанар. Үрдүк үөрэх кыһаларыгар докумуону туттарыыга 40-тан итэҕэһэ суох баал ирдэнэр.
Омук тылын биир кэлим эксээмэнэ 2 чаастан турар: суругунан уонна «Говорение» диэн тылынан кэпсээһин. Бу икки чааһы тус-туспа күҥҥэ туттараллар. Тылынан кэпсээн туттарыы чааһа бэс ыйын 7 уонна 8 күннэригэр буолар, оттон бэс ыйын 11 күнүгэр суругунан туттарар чааһын толоруохтара. Эксээмэни туттарарга 5 араас омук тылын тахыахха сөп, ол курдук англия, франция, испания уонна кытай тылларын.
«Говорение» чааһын ураты ньыманан туттараллар. хас биирдии выпускник окмпьютерга олорон эппиэттэрин саҥаны устар станция утары устар. Биир сорудаҕы толорон, ол эбэтэр тылынан эппиэттээн бүппүтүн кэннэ биирдэ аныгыс боппуруос бэриллэр. Хас биирдии эппиэккэ 17 мүнүүтэ бэриллэр. Үлэлээн бүтэн баран эппиэттэри устууну истиэххэ сөп.
Тылынан эппиэттиир чааһы туттарыы булгуччулаах буолбатах. Ол эрэн эксээмэн түмүгэр оруолу оонньуур. Тоҕо диэтэр, суругунан уонна тылынан туттарыллар чаастар бааллара холбуу ааҕыллаллар. Суругунан үлэҕэ муҥутаан 80 баал көрүллэр, оттон тылынан эппиэттээх чааска — 20 баал. Омук тылын эксээмэнигэр алын баал — 22.
Хас биирдии эксээмэн хоһо видеонан көрөр систиэмэлээхтэр, анал бырагыраамалардаах «интернет»ситимигэр холбоммот компьютердарынан хааччыллан тураллар.
Бу предметтэргэ биир кэлим эксээмэннэр түмүктэрин бэс ыйын 25 күнүн кэннэ билиэхтэрэ.
Бэс ыйын 11 күнүгэр биология, история уонна омук тылын суругунан чааһын туттарыахтара.
СӨ Бырабыыталыстыбатын Уонна Ил Дархан пресс-сулууспатын матырыйаалыттан
