2025 сыл илиҥҥи халандаарынан — От күөҕэ өҥнөөх мас моҕойун сыла тохсунньу 29 күнүттэн саҕаланар.
Кытайдарга моҕой бэлиэтэ муудараһы, уоскулаҥы уонна мааны буолууну бэлиэтиир. От күөҕэ өҥ эйэлээх буолууну, санаа табыллыытын уонна ис турук саҥалыы тыыннаныытын көрдөрөр.
Астрологтар этэллэринэн, 2025 сыл үгүс элбэх кыаҕы биэриэҕэ. Сорохторго олохторун тосту уларыталларыгар сөп түбэһэр түгэн тосхойуон сөп. Кэлэн иһэр сыл саҥа дьиэҕэ көһөргө, үлэни уларытарга, кэргэн тахсарга уонна оҕолонорго табыгастаах сыл буолуоҕа.
Оттон Саҥа 2025сылын хайдах бэлэмнээх көрсөбүт:
- Дьиэбитин киэргэтэбит. Дьиэбитин сууйан-сотон, туһата суох маллартан босхолонон баран бырааһынньыкка бэлэмнэнэн дьиэбитин киэргэтэбит. Харыйа туруорабыт, араас дьэркээн өҥнөөх гирляндалары ыйыыбыт, тиэргэммитигэр хаар, муус оҥоһук оҥоруохпутун, түннүктэрбитигэр араас быһыылаах ойуулары кырыйан сыһыарыахха сөп.
- Тугу кэтэн маанымсыйабыт? Дьахталлар киэһээҥи мааны былааччыйа көрдөнөллөр. 2025 сыл бэлиэтэ — От күөҕэ мас моҕой олус мааны, сыаналаах көрүҥнээх кылабачыгас өҥнөөх, пайеткалардаах, стразылардаах матырыйаалы ордорор. Эр дьон мааны көстүүмү талыаҕа. Классическай бүрүүкэлээх, уһун сиэхтээх ырбаахылаах көстүүм хаһан да муодаттан хаалбат.
- Бырааһынньыктааҕы остуолу киэргэтэбит. Моҕой барыта кэрэ көстүүлээҕи ордорор, онон сервировкаҕа ордук болҕомто уурар ирдэнэр. Остуол ыскатырыттан саҕалаан салфетканы, иһити-хомуоһу кыһыл уонна кыһыл көмүс өҥнөөҕү талан бэлэмниир ордук буолуоҕа. Ону тэҥэ киэргэтиигэ айылҕа матырыйааллара ордук барсыахтара: харыйа лабаата, күөх үүнээйи, мастан оҥоһуллубут киэргэллэр.
- Бэлэхтэри талабыт. 2025 сыл бэлиэтин көрдөрөр маллары утары уунар бэлэххэ бэлэмниэххэ сөп. Оттон симэх бэлэхтиир түгэҥҥэ моҕойго маарыҥныыр биһилэх, оҕуруо, ытарҕа талан ылыахха сөп.
- Саҥа Дьыллааҕы сынньалаҥ күннэрин хайдах атаарары былаанныыбыт. Кылгас кэмнээх сынньалаҥҥа барыахха сөп. Холобур, хайыһардыыр базалаах сиргэ буоллун, хаҥкылыыр, сыыртан сырылыырга табыгастаах миэстэлэргэ сынньалаҥы атаарыахха сөп. Ону тэҥэ доҕоттору, аймахтары кытары истиҥ көрсүһүүлэр уһун өрөбүллэри биллэрбэккэ аһардыахтара.
Саҥа Дьылага бэлэмнэнии хас биирдии ыалга, хас биирдии дьиэҕэ бэйэтэ туспа уратылаах, үгэстээх. Ол гынан баран, хас биирдии кэлэр сылы умнуллубаттык, хатыламматтык, өйгө хаалардыы көрсөргө бары да дьулуһабыт.