Уруһуй умсулҕаннаах эйгэтигэр бэйэтин ураты суолун тэлиммит Александра Михайлова
улахан дьоҥҥо анаммыт мастер-кылаастара уонна хартыыналарын быыстапкатын аһыллыыта А. Г. Прокопьев аатынан Үөһээ Бүлүүтээҕи история уонна этнография музейыгар буоллан ааста.
Хартыыналарын быыстапката уонна мастер-кылаастар от ыйын 6-8 күннэригэр ыытыллаллар.
Александра Михайлова хайдах уруһуйдуур буолбутун туһунан кэпсээтэ. Бэйэтэ Сунтаартан төрүттээх, билигин Дьокуускай куоракка олорор. «Передвижная живопись» диэн проектаах эбит. Бэйэтин биир санаалаахтарын муһан мастер-класстары ыытар.
Александра Михайлова 2022 сылтан уруһуйдаан саҕалаабыт. Билигин 200-тэн тахса үлэлээх.
Кини педагог идэлээх биология учуутала эбит. Айар үлэҕэ урут сыстаҕаһа суох этим диэн кэпсиир.
2011-2012 сылларга Александра Михайлова ыалдьан киирэн барбыт. 2021 сылга эпэрээссийэлэнэр. Ол кэнниттэн илиитэ бэйэтэ «уруһуйдуур» буолбут. Ол кэннэ маастар-кылааска баран холонон көрөр. Эмискэ хаһан да уруһуйдаабатах киһиэхэ аан маҥнайгы холонуутугар уруһуйа табыллар. Ол кэнниттэн уруһуйдуур буолбут. Ордук суолу хартыынаҕа суруйарын туһунан кэпсээтэ. «Күннээх суол» диэн ааттыыр эбит суоллаах уруһуйдарын ыалдьан баран бэйэтигэр «алгыс» хартыына оҥостубут. Ордук айылҕаны ойуулуурбун таптыыбын диэн кэпсээтэ. «Хартыына эйигин кытары кэпсэтэр» — диэн Александра Михайловна бэлиэтээтэ. Хас күн аайы көрөр хартыынаҥ эйиэхэ дьайар буолар эбит. Кусаҕан да өттүгэр, үчүгэй да өттүгэр. Ол иһин Александра хас биирдии хартыыната «Алгыс» буолар. Хартыыналара барыта киһи кутун-сүрүн көтөҕөргө аналлаах, киһи баҕа санаатын толорор, киһи олоҕор кэрэни тардарын курдук уруһуйдуур. «Манифест» хартыыналар диэн этиэххэ сөп.
Онон Александра хас биирдии хартыыната туспа суоллаах, кэрэҕэ, үчүгэйгэ тардар суолталаахтар. Дьоҥҥо-сэргэҕэ сырдыгы аҕалар сыаллаах-соруктаах худуоһунньук.
Анастасия Мордовская,
«Үөһээ Бүлүү» хаһыат