Үөрэх-билии биһигэ – ҮӨҺЭЭ БҮЛҮҮ — Верхневилюйская газета

Үөрэҕирии ситимэ төрүттэммитэ 150 сылыгар аналлаах «Үөрэх-билии биһигэ – ҮӨҺЭЭ БҮЛҮҮ» улуустааҕы ыһыах үөрүүлээх аһыллыыта Түгэхтэй алааһыгар ыраахтан-чугастан күндү ыалдьыттары муста.

Алгысчыт Трофим Миронов Айыыларга, иччилэргэ сүгүрүйэр, махтанар, көрдөһөр сиэри-туому толорон, бар дьонугар алгыһын тиэртэ. Алгыс тыла саргыны салайсар, үтүөҕэ үөрэтэр, үрдүккэ үүннэрэр күүстээх. Кэлбит ыалдьыттар алгыс үтүө тылын иҥэриннилэр.

Улууспут аҕа баһылыга Валерий Николаев үрүҥ тунах ыһыаҕынан эҕэрдэлээн туран, «Саха Өрөспүүбүлүкэтин култууратын үтүөлээх үлэһитэ» бочуоттаах ааты Н.И. Бойлохов аатынан оҕо искусство оскуолатын уһуйааччытыгар Татьяна Даниловна Спиридоноваҕа, «Гражданскай килбиэн» анал ааты СӨ норуотун хаһаайыстыбатын үтүөлээх үлэһитигэр, үлэ бэтэрээнигэр Илья Ильич Саввиновка, «Гражданскай килбиэн» анал ааты урбаанньыкка, Үөһээ Бүлүү улууһун меценатыгар Светлана Светлановна Сортоловаҕа, «СӨ муниципальнай сулууспа туйгуна» бочуоттаах ааты СӨ «Үөһээ Бүлүү улууһа» МТ администрациятын үлэҕэ харыстабылын сүрүннүүр исписэлииһигэр Фаина Евстафьевна Ивановаҕа туттартаата.

Салгыы эҕэрдэ тылы маанылаах ыалдьыт, СӨ үөрэх уонна наука миниистирин бастакы солбуйааччыта Ньургун Михайлович Павлов эттэ уонна Саха Өрөспүүбүлүкэтин Бырабыыталыстыбатын грамоталарынан үлэ бастыҥнарын наҕараадалаата.

“Үөһээ Бүлүү улууһун бочуоттаах олохтооҕо” үрдүк ааты улуус депутаттарын Сэбиэтин бэрэссэдээтэлэ Николай Николаев улуус социальнай-экономическай сайдыытыгар тус кылааттарын иһин наҕараадалары туттарда. РФ уопсай үөрэхтээһинин бочуоттаах үлэһитэ, СӨ нэһилиэнньэ социальнай харысхалын үтүөлээх үлэһитэ, СӨ үөрэҕириитин туйгуна Петр Николаевич Бубякин, РФ уопсай үөрэхтээһинин бочуоттаах үлэһитэ, СӨ үөрэҕириитин туйгуна Иван Степанович Боескоров, РСФСР норуотун үөрэҕириитин туйгуна, СӨ «Гражданскай килбиэн» анал аат туһааннааҕа, Быракаан нэһилиэгин бочуоттаах олохтооҕо, СӨ физическай культуратын уонна спордун бэтэрээнэ Юрий Дмитриевич Павлов, педагогическай үлэ бэтэрээнэ, үөрэх үлэһиттэрин Профсойууһун чилиэнэ, «За вклад в развитие дошкольного образования» уонна «Педагог-наставник» түөскэ кэтиллэр бэлиэлэр хаһаайкалара Ульяна Капитоновна Иванова, СӨ култууратын туйгуна, С.Сидорова аатынан бочуотунай бэлиэ хаһаайката, Үөһээ Бүлүү улууһун бочуот кинигэтигэр киирбит Валентина Владимировна Семенова, Герой-ийэ, СӨ култууратын туйгуна, Кэнтик нэһилиэгин бочуоттаах олохтооҕо, “Гражданскай килбиэн” бэлиэ хаһаайката Татьяна Давыдовна Сивцева, Саха АССР үөрэҕириитин туйгуна, Ороһу нэһилиэгин бочуоттаах олохтооҕо, СӨ тутуутун бэтэрээнэ, улуус култууратын бэтэрээнэ, “СӨ норуот айымньытын сайдыытыгар кылаатын иһин” түөскэ кэтиллэр бэлиэ хаһаайына Пантелеймон Прокопьевич Егоров бу үрдүк аакка тигистилэр.