Алтынньы 24 күнүттэн саҕалаан улуус уонна бөһүөлэк дьаһалталарын фойеларыгар байыаннай дьайыыга сылдьар уолаттарбыт сырдык тыыннарын көмүскүүр, хаххалыыр аналлаах маскировочнай сеткалары баайарга нэһилиэнньэни бүттүүн кытыннарар сыаллаах акция саҕаланна.
Бу акцияҕа биир бастакынан кыттыыны ылбыт, илиитин сылааһынан араҥаччылыырын биллэрбит муниципальнай сулууспа туйгуна, 41 сыл усталаах-туоратыгар уруккута Сэбиэккэ, кэлин дьаһалтаҕа үтүө суобастаахтык үлэлии сылдьар Людмила Лазаревна Петровна: “Уолаттарбыт барахсаттар үрүҥ тыыннарын өллөйө, хара тыыннарын харысхала буоллун диэн санааттан оҕотуттан саҕалаан оҕонньоругар диэри бу үлэҕэ кимиилээхтик туруннубут. Кыайыы син-биир биһиэнэ буолуоҕа”, -диэн санаатын үллэһиннэ.
Онтон улуус дьаһалтатын дьыалаларыгар улуус баһылыгын солбуйааччы, улууспутуттан байыаннай дьайыыга кытта сылдьар уолаттары кытта өрүү сибээстэһэ, өйүү, кинилэр тустарыгар сүрэхтиин-быардыын ыалдьа олорор Михаил Михайлович Егоров бүгүҥҥү акция туһунан маннык кэпсээтэ:
-Өрөспүүбүлүкэ биир саамай көхтөөх, күүстээх волонтера Ольга Петровна Захарова уонна “Защитники Отечества” өрөспүүбүлүкэтээҕи фонд координатордарын көҕүлээһиннэринэн, улууспут уонна нэһилиэкпит дьаһалталарын өйөбүллэринэн бүгүн 10 чаастан сетка баайыытын акцията саҕаланна. Сэтинньигэ улуус баһылыга Валерий Николаев салайааччылаах гуманитарнай көмөнү тиксэрэр делегация барыытынан бу сеткалары ыытар былааннаахпыт, билигин көмөнү түмүүнү саҕалаатыбыт.
Соторутааҕыта “Защитники Отечества” фонд улуустааҕы координатордара Игнат Владимирович Трофимов уонна Ольга Петровна Захарова “Кыайыы туһугар” общественнай тэрилтэ тэринэн, аҕыйах хонуктааҕыта «СВО-их не бросаем» диэн гуманитарнай сыаллаах концерт тэрийбиттэрэ. Ол концертан киирбит үбүнэн маскировочнай сеткаларыга аналлаах спандбонду уонна сетканы атыылаһан, баайыы үлэтэ саҕаланна. Бу акция бүгүҥҥү күнүнэн түмүктэммэт, көмөлөһүөн, өйүөн баҕалаах дьоҥҥо улуус уонна бөһүөлэк дьаһалталарын ааннара үлэ күннэригэр өрүү аһаҕас буолуохтара.
Бүгүҥҥү акцияҕа дьаһалта үлэһиттэрэ 100 % кытыннылар. Кинилэри сэргэ 4 №-дээх «Сардаана» уһуйаан коллектива биир бастакынан көмөлөһө кэлбититтэн олус үөрэн, махтанан олоробут. Бу акцияҕа улууһум олохтоохторун бука барыгытын көхтөөхтүк кыттан, ис сүрэххититтэн уолаттарбыт үрүҥ тыыннарын өллөйдүүргэ көмөлөһөргүтүгэр ыҥырабын!
Трофимов Игнат Владимирович, “Защитники Отечества” государственнай фонд Үөһээ Бүлүүтээҕи филиалын социальнай координатора:
-Фонд үлэтин кылгастык билиһиннэрдэххэ, анал байыаннай дьайыыга сылдьан сырдык тыыннарын толук уурбут уолаттарбыт дьиэ кэргэттэрин, байыаннай дьайыы бэтэрээннэрин кытта үлэлэһэбит уонна сураҕа суох сүппүт уолаттары көрдөөһүнүнэн дьарыктанабыт. Биир сүрүн сыалбытынан-сорукпутунан уолаттарбыт ааттарын үйэтитии буолар. Ону таһынан, общественниктары, волонтердары барыларын түмэн, “Кыайыы туһугар” диэн түмсүү тэриммиппит. Бу үлэбит чэрчитинэн төгүрүк сыл устата, байыаннай дьайыы түмүктэниэр диэри, туох баар улуус олохтоохторун кыттыһыннаран туран, маскировочнай сеткалары баайыыны саҕалаатыбыт. Бу сеткалары анаан-минээн Үөһээ Бүлүү уолаттарыгар баайабыт, кинилэргэ аадырыстаан ыытыахпыт. Сетка туһата сүрдээх улахан: дрон көрбөккө аастаҕына, сетка анныгар сытар уолаттарбыт тыыннаах хаалаллар. Онон саамай наадалаах тэрил. Билиҥҥитэ дьон акцияҕа кыттыыта үчүгэй, көхтөөхтөр, билиҥҥитэ 30-ча киһи кытынна.
Түгэнинэн туһанан, улуус олохтоохторун ыҥырабын: маскировочнай сеткалары баайыан баҕалаахтарга ааммыт өрүү аһаҕас. Уолаттарбыт байыаннай дьайыыга ханнык да биричиинэнэн барбыттарын иһин, кинилэр – бэйэбит оҕолорбут, ыал аҕалара, кэргэттэрэ. Хас биирдии сетка саамай уолаттарбыт олохторун быыһыыр аналлааҕын өйдөөн, тохтоло суох көмөлөһөргүтүгэр ыҥырабын. Эппитим курдук, бу акция сэрии бүтүөр диэри тохтоло суох барар.
Маны сэргэ Олоҥхо дьиэтигэр волонтердар күүстэринэн гуманитарнай көмөнү оҥорор пуун арыллан эрэр. Манна аадырыстаах буолбакка, уопсай көмөнү тутабыт. Буортурбат астан уратыны туох көмөлөөх буолуо дии санаабыккытын: кураанах паегу, фонариктары, чүмэчилэри, сылаас таҥаһы, онтон да атын малы-салы аҕала туруоххутун сөп. Быһа холуйан сэтинньи саҥатыгар пуун үлэтин саҕалыаҕа, чуолкай кэмин эбии биллэриэхпит. Пууҥҥа волонтердар өрүү баар буолуохтара, эһиги көмөҕүтүн тутуохтара.
Галина Васильева
«Үөһээ Бүлүү» хаһыат