Быйылгы ыытыллар үлэлэр Россияҕа Норуоттар Сомоҕолоһууларын, Саха Республикатыгар Култуура, Үөһээ Бүлүү улууһугар Үөрэҕирии уонна О.Д. Федорова аатынан киин модельнай библиотека тэриллибитэ 90 сылларын иитинэн ыытыллаллар.
Үөһээ Бүлүү оройуона төрүтэммитэ 91 сылыгар О.Д. Федорова аатынан киин модельнай библиотекаҕа олунньу 11 күнүгэр күнүс 2 чаастан “Кэрэхсэбиллээх көрсүһүү” бырайыак бырааһынньыктааҕы тэрээһинэ элбэх киһи кыттыылаах үрдүк таһымҥа буолан ааста.
Улууспут дьоһун дьонун кытта көрсөр, сэргэхтик сэһэргэһэр үгэс буолбут тэрээһиммит ыалдьытынан СӨ норуотун хаһаайыстыбатын үтүөлээх үлэһитэ, СӨ бочуоттаах ветерана, Үөһээ Бүлүү улууһун уонна Үөһээ Бүлүү, Мэйик нэһилиэктэрин бочуоттаах олохтооҕо, “Партийная доблесть” уордьан кавалера Георгий Алексеевич Степанов буолар.
Тэрээһиҥҥэ Үөһээ Бүлүү бөһүөлэгин баһылыга М.С. Силигиянов, Мэйик нэһилиэгин баһылыга И.И. Яковлев, “Үөһээ Бүлүү” хаһыат редакциятыттан Г.В. Васильева эҕэрдэ тылларын эттилэр. Георгий Алексеевич Далыр оскуолатыгар бииргэ үөрэммит доҕотторо, улууска араас кэмнэргэ, араас эйгэҕэ бииргэ үлэлээбит дьоно – сэргэтэ, “Сапи-Полис” страховкалыыр хампаанньаҕа бииргэ үлэлээбит коллегалара, чугас аймахтара буолан, улуус ытыктыыр киһитин Георгий Алексеевич Степанов олоҕун, өр сыллаах үлэтин кэпсиир үтүө түгэнин сэргээн иһиттилэр, эҕэрдэ тылларын эттилэр. Көрсүһүүнү улуус убаастанар учуутала М.Т. Александрова иилээн-саҕалаан ыытан, Георгий Алексеевич олоҕун суолуттан араас ыйытыылары биэрэн сырдатта. Ф. Лобанов “Эн комсомол — мин дьолум” ырыатын бииргэ ыллаан, эдэр кэмнэрин санаан ыллылар.
“Георгий Алексеевич Мэйиктэр тумус туттар убайбыт, улахан удьуордаах дьон ыччаттара, үөрэнэн, үлэһит киһи буолан, дойдутун дьонугар бары өттүнэн күүс-көмө, тирэх буолар. Оскуолаҕа үөрэнэ сырыттахпытына Георгий Степанов үөрэммит, олорбут паартата диэн баар этэ. Ол паартаҕа үчүгэй, бэрээдэктээх үөрэнээччилэр олорооччулар. Георгий кыра оҕо эрдэҕиттэн сайаҕас, ытык киһи, сааһынан буолбакка, бэйэтин майгытынан. Далырга да, студенныы сылдьан да каникулларга дойдутугар кэллэҕинэ ыалларга сылдьан оҕонньотторго тугу билбитин, көрбүтүн-истибитин, Аан дойду сонунун кэпсээччи. Олохтоохтор Гошаттан киһи киһитэ тахсыа диэн баардылыыллара. Далырга үөрэнэ сылдьан интэринээт оҕолоругар оһуохай тэрийээччи, ону улахан дьон киирэн истэн, сөҕөн-махтайан тахсаллара” — диэн биир дойдулаахтара ахтан аастылар.
Георгий Алексеевич эдэр сааһыттан Комсомол үлэтигэр уһаарыллан, күн бүгүнүгэр диэри араас салайар үлэҕэ үлэлээн кэллэ. Улуус патриота буолан, былааска ханнык да салайааччы олорбутун иһин, уопсай биир тылы булар, онон салайар тэрийэр дьоҕурун билинэннэр араас сүрүн дуоһунастарга үлэлэппиттэрэ. Элбэх улахан дуоһунастаах дьону, салайааччылары кытта алтыһан, араас үлэҕэ үлэлээн билиитинэн-көрүүтүнэн, салайар дьоҕурдааҕынан улахан убаастабылы ылар. Кини ханнык да тутулга бэйэтин идеологиятыттан халбаҥнаабат уонна бэйэтэ ханнык да былаас уларыйбытын иһин туора турбат, былааһы ытыктыыр, убаастыыр киһи.
Билигин 2018 сылтан Үөһээ Бүлүү бөһүөлэгин дьаһалтатыгар общественнай сэбиэтигэр сүбэһитинэн үлэлиир. Бу үлэ — түгэҕэ биллибэт киэҥ далааһыннаах үлэ буолар. Онно барытыгар бэйэтин билиитинэн, уопутунан сүбэ-ама биэрэн, бэйэтинэн да бииргэ сылдьан үлэлээн, бөһүөлэк үлэтин-хамнаһын тэрийсэр. Кини салайыытынан Манчаары оонньууларын көрсө бөһүөлэги ырааһырдыыга киэҥ хабааннаах үлэлэр ыытыллыбыттара. Ленин паамытынньыга оннун булан, сквер оҥоһуллубута.
Георгий Алексеевич Үөһээ Бүлүүтээҕи РФ Коммунистическай партия тэрилтэтин секретара, “Үөһээ Бүлүү” хаһыат общественнай корреспондена. “Куорамыкы уоттара” сыһыарыыга бөһүөлэк үлэтин-хамнаһын сырдатар селькор. Улуу сэрии уонна ветераннар советтарын, Үөһээ Бүлүүтээҕи “Устуоруктар уонна кыраайы үөрэтээччилэр”, “Ийэ тыл”, “Оһуохай” түмсүүлэрин чилиэнэ. Улуус олоҕун сырдатар, үйэтитэр кинигэлэр автордара уонна кыттыгас автордара.
2020 с. Үөһээ Бүлүү улууһа төрүттэммитэ 85 сылын көрсө “Состояние и перспективы недропользования на территории Верхневилюйского улуса”;
“Комсомолтан куорсун анньынан”;
2011 с. Үөһээ Бүлүү почтатын 95 сыла;
2018 с. Комсомолтан куорсун анньынан;
2018 с. Үөһээ Бүлүү комсомола – иитиллибит кыһам, мин киэн туттуум. Ленинскэй комсомол 100 сыллаах үбүлүөйүгэр;
2021 с. Алмазов якутских невидимые грани…;
2022 с. Үөһээ Бүлүү нэһилиэгэ үүнүү-сайдыы суолунан;
2024 с. Ахтар-саныыр кэмнэрбит “САПИ_ПОЛИС” страховкалыыр хампаанньа Үөһээ Бүлүүтээҕи филиала төрүттэммитэ 30 сылыгар;
“Олоххо уонна үлэҕэ бэриниилээх буолуу” Георгий Алексеевич олоҕун, үлэтин — хамнаһын сырдатар хаартыскаларын, наҕараадаларын, хомуйан таһаарбыт кинигэлэрин көрдөрөр, билсиһиннэрэр киэҥ ис хоһоонноох быыстапканы кэлбит дьон сэргии көрдө. Бу көрсүһүүгэ Мэйиктэн төрүттээх икки көмүс куоластаах ырыаһыттар Георгий Степанов “Сулустар”, Игорь Яковлев — Мыкытыа “Аҕабар” ырыалара көрөөччүлэр сэҥээриилэрин ылла. Георгий Алексеевич оһуохайдаан махталын, үтүө алгыс тылын анаата.
Түмүккэ “Кэрэхсэбиллээх көрсүһүү” геройа Георгий Алексеевич: “Бүгүҥҥү күҥҥэ наһаа махтанабын, барыгытынан киэн туттабын. Мин олоҕум олус интэриэһинэй. Олох киһиэхэ тугу биэрэрэ киһи бэйэтиттэн тутулуктаах. Үлэлээбит сирим да, үлэлээбит бииргэ алтыспыт дьонум да элбэх. Ол барыта үтүө санаа, үтүө өйдөбүл буолан сүрэхпэр сылдьар.
Евдокия Буртахова,
Үөһээ Бүлүүтээҕи О.Д. Федорова аатынан киин модельнай библиотека специалиһа
«Үөһээ Бүлүү» хаһыат